Pichichi Trophy - Tu nge Pichichi chu?

Spain rama football inelna sang ber La Liga-a goal khung tam ber hnenah Pichichi Trophy hlan ṭhin a ni a, Telmo Zarra leh Lionel Messi ten vawi ruk ve ve an dawng tawh a, Argentine forward Messi hian tun season-a a dawng leh a nih chuan record thar a siam dawn.

Ngaihtuahna awm thei chu engvangin nge Pichichi Trophy tih a nih? Football ngaina tam tak zingah hre lo a awm theih tlat. League tam takah chuan goal khung tam ber hi a hming aṭangin a hriat nghal - England-ah chuan Golden Boot tih a ni a, Italy-ah Capocannoniere (Top Scorer) leh Turkey-ah Gol krallıgı (Goal king) tih a ni.

Spain ramah erawh Rafael Moreno Aranzadi (Pichichi) hming chawiin Pichichi Trophy tih a ni a, Pichichi hi law (dan) zir ṭhin a ni a, Athletic Bilbao legend a ni a, referee a ni a, kum 29 mi lek niin khawsikpui natna vangin a thi.

Rafael Moreno Aranzadi hi Pichichi tiin an ko ṭhin a, May 23, 1892 khan Bilbao, Spain-ah a piang. Moreno pa hi dan hre mi (lawyer) a ni a, city mayor hna te pawh chelh tawh niin a nu hi thuziak thiam hmingthang Miguel de Unamuno te nen an inchhung.

Moreno te hunlai hian Bilbainos-ah chuan football hi thil thar a ni a, chutichung chuan kum naupang te nichungin Moreno hian football a tuichilh der tawh. Chhungkaw khawsa thei aṭanga seilian a ni a, a chhungten football kalsana lehkhazir lama kal turin an duh.

Amaherawhchu Moreno hi zirtirtuten an thunun thei lo a, a patea (puithiam) pawhin thuawih lo leh buaina siam ṭhin tiin a chanchin hi a sawi hial. Law zir turin university-ah a kal lo a, kum khatnaah exam pakhatah pawh a pass lo - a chawlhsan a ṭul phah hial. Heng zawng zawng hi a chhan chu football a dah pawimawh ber vang a ni.

Rafael Moreno Aranzadi hian Pichichi hming a put chhanah hian inhnialna a tam hle a, sawi dan pawh a inang lo. Pichichi hi 'varak te' (little duck) tihna a ni a, amah hi 5ft 1in chauha sang a ni nghe nghe.

A phuahtu hi ṭhenkhat chuan a unaupa Raimundo an ti a, ṭhenkhat erawhin a ṭhian kawm ṭhin te, local press te, San Mames-a inkhel entu mipui te leh Athletic tana a khelhpuite tiin an sawi bawk.

A hming phuahtu chu eng pawh ni se khelmuala a thil tih chu a chanchin a sawi zui chhan ber a ni thung. A unaupa (cousin) Alfonso Moreno chuan, "Ball tauh leh set play-ah mi bik a ni a. Chumai a ni lo, ball khalh a ni tawh chuan mi dang chunga leng a ni a, field tawp leh tawp hi buaina nei loin a khalh thei a, goal ropui a khung ṭhin. Team inhmun a chhia a nih chuan mipuiin Pichichi chu dinhmun siam ṭha turin an beisei ṭhin," tiin chhuang takin Pichichi chanchin a sawi

Pichichi hi 5ft 1in chauha sang a ni chungin boruakah pawh a ṭha tel a, Spain tana a goal khung awmchhun pawh a tauh luh a ni.

Pichichi hian kum 19 mi a nihin Athletic Bilbao a zawm a, club tana a goal hmasa ber hi kum 1913 khan Real Madrid lamah Copa del Rey semifinal-ah a khung. Athletic hi 3-0 in an chak a, Pichichi hian minute hnihna lekah a khung.

Hemi kum vek hian Athletic-in an stadium thar San Mamés an hawng a, goal hmasa ber hi Pichichi hian a khung. Athletic hi an hmelma Racing Club de Irún nen 1-1 in an inhnehtawk. Pichichi hian 'bandana' a hren ṭhin avangin hriat hran a awlsam a, Athletic hi Copa del Rey-ah 1914, 1915, 1916 leh 1921 khan a champion pui a, Northern/Vizcayan Regional Championship-ah vawi nga a champion pui bawk.

La Liga erawh kum 1928 aṭanga an ṭan chauh avangin a khel hman lo a, chutihrualin a club khelhna chhun Athletic tan match 170-ah goal 200 a khung. Media lam chuan goal a khung theih avangin “el Rey del Shoot” (the Strike King) tiin an sawi a, English club tam takin a chanchin hriain lakchhuah duh mah se Bilbao chhuahsan a duh lo.

Spain national team hmasa berah Pichichi hi a tel a, 1920 Olympic khel turin team hi an din. He team-ah goalkeeper ṭha lawmman 'Zamora Trophy' chawimawina hming phuah chhan Ricardo Zamora pawh a tel.

Antwerp-a inelna neihah hian Pichichi hian beisei a pha lo a, chutichung chuan Netherlands 3-1 a an hneh ṭumin goal a khung. Spain hian silver medal an dawng a, Barcelona 1992-ah heta an record hi an khum leh chauh. Pichichi international career chu thla khat chhungin a tawp a, ram tan match nga chiah a khel.

Pichichi hian a career tawp lamah nasa taka sawisel a tawk a, a lar bikna hi a khelhpuiten pawm harsa an ti a. A unaupa (cousin) pawhin, "A chang hi chuan a mimal lek lek ṭhin a, team-ah a khel tih hi a hre lo ṭhin," tiin an sawiselna ṭhenkhat hi a pawm thu a sawi ve bawk. 

Club lamah a khel ṭha lo chhunzawm a, San Mames-a amah ṭan ṭhintute'n an hawisan a, ball a chanin lehlam an hawi a, chawl turin an au el bawk. Mipui ngenna angin kum 29 mi lek a nihin Pichichi hian football khelh a chawlhsan.

Pichichi hian football erawh a hmangaih reng a, a kalsan thei lo. Fotoball khelh a chawlhsan hnuah referee a ni a, a match kaihhruai hmasak ber pawh Bilbao khelmual San Mamés-ah a ni a, amaherawhchu referee hna chu inkhelh angin nuam a ti lo.

March 1, 1922-ah Pichichi chu khawsikpui avangin a thi deuh thut a, a nupui leh a fanu a kalsan bakah khaw mipui an ngui hle. A thih meuh chuan a career tawp lama au el tute chu an inchhir hle.

Athletic thuneitu chuan Pichichi chunga zahna lantir nan kum 1926 khan stadium-ah a lim an dah a. Hemi hnu hian club captain reng reng an vawi khat tlawhna a nih chuan pangpar dah turin an beisei. Kum 2013 khan San Mames hi sak ṭhat a ni a, Pichichi lim hi player luhna bulah dah a ni a, lim bula pangpar dah pawh chhunzawm a ni bawk.

Marca chanchinbu chuan 1952–53 season aṭangin goal khung tam ber hnenah chawimawina an pe a, a hming atan Pichichi Trophy an vuah. He chawimawina dawng hmasa ber chu Athletic legend tho Telmo Zarra a ni.