Entu awm loa khelh reng a pawi thei - Wenger

Arsene Wenger chuan a hmuna entu awm loa football khelh chu hun rei tak chhung a nih chuan a pawi theih thu a sawi a, tun dinhmunah erawh season hman zawh nan duhthlan tur dang a awm chuan loh thu a sawi bawk.

Covid-19 vangin European football chu thla hnih vel an chawl, tun hnaiah German Bundesliga chu khel ve leh tawh mah se English Premier League, Spanish La Liga leh Italian Serie A te chu khelh chhunzawm a la ni lo a, an chhunzawm hun tur pawh tih chian a la ni lo.

FIFA chief of global football development nilai Wenger chuan, "Entu awm loa inkhelh hi a ṭha em? A pawi thei em? tih zawhna a tam hle. Kei chuan hun rei tak chhung a hmuna entu awm loin kan khel a nih chuan nghawng ṭha lo tak a nei ang ka ring.

"Tuna hmun ṭhenkhata an kalpui dan hi chu hun rei lote chhung, harsatna zualpui awm chhunga tih tur a ni. Entu awm loa season tluan hman a ngai tur ang phei chuan ngaihtuah ngam chiah pawh ka ngai lo," a ti.

Arsenal manager hlui chuan sawi chhunzawmin, "Inkhel thei loa kan awm reng a nih chuan sum leh pai a nghawng tur hi a lian em em a, club mai bakah player tan a pawi dawn. Chutihrualin, eng thutlukna pawh kan siam dawn a nih chuan pawisa aiin hriselna kan ngai pawimawh hmasa tur a ni ang," tiin a sawi bawk.

French pachal hian Bundesliga a en thu leh, a hmuh dan chuan team tam zawk chu inkhel tura an la inpeih tawk lo nia a hriat thu a sawi bawk a ni.