Serie A team an la training rih lo

Coronavirus len hnuah football a chiri a, thu chiang pawh a awm hleithei lo. Thawhṭanni aṭanga team training pangngai nei tura tih Serie A club-te chu damdawi lam thiam ten an dan zawm tur leh kalphung tur an siam chu fuh tawk loa an hriat avangin an training rih lo.

Italy sorkar kalphungah chuan Serie A club-te hi an inkhelh dawn apiangin Covid-19 an kai em tih endik tur a ni a, player zingah hri kai an awm chuan team pumpui chu ni 14 khung hran tur an ni - club lam chuan team pumpui khung hrang loa player mal dah hran an duh thung.

Italian prime minister Giuseppe Conte-a'n club-te hi training neih an phal tawh thu a sawi. Amaherawhchu, Italian media lamin an tarlan dan chuan Serie A club leh Italian Football Federation (FIGC) kalphung duh dan chu sorkar lama damdawi thiamten him tawk rih loah an ngai.

Serie A hi March 9 aṭang khan hri leng vangin an chawl lailawk, tuna an beisei dan chuan June 13 aṭanga khelh chhunzawm theih an inring. League khelh zawh ngei duh mah se tunah chuan an duh leh tum angin thil a la kal thei rih lo.

Team training nei rih lo mah se club-ten mimal training an kalpui reng tho, player-te chu hlawm hrang hranga ṭhen hrangin inhnaihchilh si loin inbuatsaihna hautak lo zawk an neihpui a ni.

Team hrang hrang chuan endikna an nei tawh a, tun hnai khan Inter Milan pawh an player bakah coaching staff zawng zawng chu hri an kai em tih enfiah an ni a, hripui lakah hian an fihlim rih.