Nun duhawm chu - Roberto Carlos

Ka inah hian thlalak pakhat, ka theihnghilh theih ngai loh ni ropui ka tawn ni ami chu ka tar reng ṭhin. 

He thlalak lo pianna en dawn chuan kum 1996 nipuiah khan kir a ngai. Real Madrid-in Inter Milan aṭanga min lei ṭum a ni a, kum 23 mi ka ni. Real ka pan hma hian Madrid khawpuiah ka la kal ngai lo. Mahse, thlawhtheihna ṭum hmuna kan ṭum rual khan ka chenna tur in emaw, Europe-a stadium mawi ber Santiago Bernabeu-ah ka kal lo. 

Spanish chanchinbumi ṭhenkhat nen hmun mawi tak Plaza de Cibeles-ah chuan kan kal nghal a ni. Cibeles hi thlalakah chuan ka lo hmu fo tawh a, a takah ka la hmu ngai lo. 

Chu hmun chu a mawi em em a, Madrid khawpuia thil langsar leh mawi chi tinreng chuan an hual vel a ni ber mai. Madrid-a cheng tawh phawt tan chuan Cibeles chu hmun mawi bik a ni a, football fans tan a mawi lehzual. 

A chhan in hre duh em? Cibeles chu Real Madrid leh Spain national team-in nomawi an chawi reng renga nomawi lawm tura an kalna hmun a ni tlat a ni. 

Ni e, Madrid thlawhna ṭum hmun aṭanga Cibeles pan nghal chu a vawi khat nana Rio de Janeiro tlawh a, 'Christ the Redeemer' lim ropui tak hmu tura kal nghal ang mai a ni. 

Ka phur em em a, chutiang taka ka phurna a sosan vanglai chu chanchinbumi pakhat chuan ka thla a lo la a ni. Chu thlalak ka en apiang chuan Real Madrid pan tura ka zinkawng kha ka hre chhuak ziah a, ka in bangah chhuang takin ka la tar reng a ni. 

Chu ka in chu Madrid khawpuiah hian a awm a, Real ka la chhuahsan lo - club tan director of institutional relations hna thawkin ka la awm a, mahse midang tam tak ang thoin pawn ka chhuak thei rih bik lo.

Tun hnai thla khat chhung khan vawi hnih chiah in ka chhuahsan a, chu pawh mamawh lam turin a ni - ka hne takzet! Mahse, tunah chuan in lama tawm rih hi kan him tlan nan tih a ṭul miau si. 

Ka chhuah ṭum vawi hnihah hian ka hawi vel a, engmah ka hmu lo. Kan khaw nuam tak Madrid kha 'Madrid' a ni ta lo mai emaw tih awl tak a ni. Ni dangah chuan naupang nui khek ri te, kawngkama thil ei chunga titi te, kum upa lam ni lum aia chhuak te hmuh tur an awm ṭhin. 

Mihringin kan mamawh ang zawng zawng, infiamna, ni chhuak duhawm, inkawm hlimna, chaw tui, ni e, a bik takin ei tur tui tak mai te chu Madrid-ah engtiklai pawhin a awm ṭhin a, nuam taka nun hman dan hi an thiam a ni ber mai. 

Mahse, tunah chuan chung thil duhawm zawng zawng chu a bo ta a, kawng te chu an reh duk a, hetiang hian Madrid khawpui ka la hmu ngai lo. 

Mimal tak chuan Covid-19 hri leng duhawm lo tak hian min nghawng hran lo - kei leh ka chhungte chu kan hriselna a ṭha em em. Mahse, he hri leng duhawm lo tak avanga miin an nunna an chan tih ka hriat ṭhin hian min run a ni. 

In hre tawh mai thei a, Real Madrid president hlui Lorenzo Sanz pawh Covid-19 vangin a thi a nih kha. Ani hi Real Madrid-a min laluttu kha a ni a, hrilengin a man khan kum 76 mi a ni tawh. Covid-19 a kai tih ka hriat rual khan a tan ka ṭawngṭai a, mahse rei tak a dam lo tawh tih kha ka hre tel tlat - a tawpah chuan chu hri leng chu hneh zo loin min kalsan ta a ni. 

Lorenzo ngaihtuahna ringawt pawh hian rilru hlim tak min puttir thei ṭhin. Real Madrid President a ni mai thei a, mahse chung zawng zawng aia a dah chungnun zawk chu Real fan a nihna chu a ni. 

Real tan a nung a, kawng engkimah khan a inrawlh a ni ber mai. Hnehna kan chan loh emaw draw result kan hlawhchhuah kha chuan a thinrim em em a, min hau hrep zel! Mahse, nomawi kan chawi a, hlawhtlinna kan chhar chuan duhsak taka min kuah hmasa bertu a ni ṭhin thung. 

A nun duhawm tak avang khan kan ngaina a, êng taka thil thlir ṭhin mi a nihna leh madridismo (Madrid ṭantu sawina) tana a hnathawh zawng zawng avang khan kan ngaina em em a, kan tan chuan 'Pa' ang mai a ni.

Nitin hian kan inbe reng ṭhin a, thurawn ṭha tak tak min pe fo. 'Lorenzo Sanz' tia koh tum ve ṭhin mah ila, ka thei ngai lo! Ka tan chuan President emaw Presi kha a ni reng a ni. 

"Presi, i ṭha maw?" ka ti a, ani chuan hlim hmel taka nui chungin min kuah ṭhin. Madrid ka pan khan Lorenzo hi Santiago Bernabeu-ah kum khat leh a chanve vel chu President a lo ni tawh. 

Madrid tana contract ka ziah hnu khan engkim mai kha chak takin a kal ni maiin ka hria. Ka match hmasa bera Deportivo de La Coruna laka ka goal khung kha ka la hre reng a, Bernabeu-a mipui 80,000 hmaa ka inkhelh hmasak ber pawh kha ka la hria. 

He hmunah hian eng nge maw ka tih ve ngawt le? tiin ka inngaihtuah hial a, ka tihsual palha thil thleng tur thlengin ka hisap a, ka hlauthawng takzet a ni. Chutihrual chuan ka nuna hun thleng duhawm ber pawl a ni lawi si. 

Hun engemaw chen hnuah chuan Real Madrid tana khelhin a ken tel 'pressure' hmachhawn ka thiam chho ṭan a, mahse kan zinga professional ber pawh hlauthawng taka an khurh chang kha chu a awm reng ṭhin. 

Kum hnih dawn Real Madrid tana ka khelh hnuah Champions League final kan khel dawn a, kan hmachhawn tur chu Juventus an ni. Kan hriat vek angin Real Madrid chu European champion ni ngun ber kan ni a, mahse khatihlaia final kan khelh dawn kha chuan kum 32 chhung kan champion tawh lo!

Kha season-ah khan La Liga-ah  beisei kan phak lo bawk a, Juve erawh a zawna a vawi thum nan Champions League final an lut thung - rin hlawh zawk chu kan ni lo chiang a ni. 

Final khelh hma zan khan tumah kan muhil thei lo. Kan tih dan ṭhinah chuan zan dar 10:00-ah hi chuan kan mu tlangpui tawh a, mahse khami zan kha chuan zing dar 4:00 thleng kan titi a, kan nun thawnthu kan inhrilh vel mai mai a ni. 

Kan hlauthawng ni pawhin ka hre hran lo. Mahse, Juventus kha kan zah em em a, final khelh vat kha kan duh a ni. Final kan khel a, kan ti ṭha viau. Juve-in chance tam tak an nei a, mahse 1-0 in kan chak. 

Kan thiamna hmangin kan chak a ni satliah lo a, kan phurna khan hnehna min chanpui a, Juventus ai khan chak kan duh zawk a ni. Nomawi chawi zawhah chuan Plaza de Cibeles lam panin kan tlan chhuak nghal a, kawtthler chu kawr va ha fans tam takin an lo luah khat a, ropui tak a ni. Kha zan kha ka theihnghilh tawh lo ang - Real Madrid-a ka hun tawn duhawm ber thlang dawn ta ila, kha hun duhawm kha ka thlang em em ang. 

Madrid-a i awm rei poh leh he club-in mipuite thinlunga hna a thawh rilzia chu i hrethiam zel ang - Madrid khawpui chauh a ni lo, Spain hmun hrang hrang leh khawvel hmun dangah pawh an ngaihlu tlat. 

Khawi hmunah pawh inkhel ila, fans kan nei zel. El Clasico emaw Cup game lian lo tak khel pawh ni ila, Bernabeu chu a khat zel. He club ka zawm chhan tho kha mipuiin he club an hmangaih chhan hi a lo ni - a ropuina, fans ṭha tak leh Champions League-a a ropuina piahlama thawnthu thar ziah ho chakna chuan min phuar khawm a ni. 

Kum 2000 chhoa 'galacticos' hunlai takte kha aw - fans tana hriatreng tlak hun hlimawm a ni satliah lo a, kha team-a player nih theih pawh kha nuam tak a ni. Dressing room-ah kan ṭhu a, hawi kual ila, Ballon d’Or dawngtu, Spanish player of the year, La Liga top scorer leh khawvela goalkeeper ṭha berte an awm a, kha hmuna awm ve theih kha a hlu takzet. 

A chang chuan kha hmunah khan ṭhu ngawi reng chungin, "I lo kalna kha thlir la, vawiina i awmna hi en leh teh, hei chen i thlen tak hi," tiin keimah leh keimah hi ka inhrilh ṭhin. Kha team-a ka tel thei kha ka inchhuang em em a ni - hringnunah hian khawiah nge kan tawp dawn tih hi tumah hian kan hre lo a lo ni. 

Real tan kum 2000 leh 2002-ah Champions League nomawi ka chawi leh a, mahse thil thlen dan zawng zawng erawh ka hre tawh lo. Real-a awm chuan 'hman' in awmzia a nei lo a, 'vawiin' atan kan hun kan hmang ṭhin. Real tana ka inkhelh loh hnuah khan ka hlawhtlinna leh hnathawhte chu ka hrethiam ve chauh a ni. 

Kan club tana ka match hnuhnung ber chu June 17, 2007 khan a ni. Bernabeu-ah 2006-07 season-a kan match hnuhnung ber tur khelin Mallorca kan mikhual a, hetihlai hian Barcelona nen kan point hmuh zat a inang. Hemi ni vek hian Barca hian Gimnastic an hmachhawn thung. Hnehna kan chan chuan Barca aia head-to-head a kan ṭhat zawk avangin kan champion dawn tih pawh kan hria.

A tirah 1-0 in kan hnufual a, a hnuah 3-1 a hnehna changin kan champion. Mahse, ka hriatrengnaa cham tlat erawh mi zawng zawngin ka chunga ṭhatna an chhuah dan kha a ni. Mi zawng zawngin ka match tawp ber a ni tih an hria a, David Beckham pawhin Real tana a match tawp ber a khel ve bawk. 

Hotel kan chhuah aṭanga stadium kan thlen thlengin mipui chuan min lo lawm em em a, duhsakna tinreng min hlan a, piancham ropui taka lawm ang mai kan ni. 

"Ka hmangaih che," "Lo kir leh vat rawh aw," tihte chu ka ṭawngkam dawn a ni a, chu hun ngei chuan he club tana ka hnathawh zawng zawng min hriatchhuahtir a, mipuiten min hmangaihzia ka hrethiam ta bawk a ni. 

Kha zan kha - ka hun tawn tawha ka thinlung dek ber pawl a ni reng a, Madrid khawpuia chengte thinlung min hriatthiamtirtu a ni ta bawk. Ka nuna kha thil thleng duhawm zawng zawng avang khan vawiina he khawpuiin chhiatna a tawh mek hian min run a ni. 

Ni e, Madrid khawpuia mipui mai ni lo, khawvel hmun hrang hrang ami te hnenah hian êng taka hma hun thlir turin ka hrilh duh. Ka nun min kaihruaitu atana hman reng ṭhin pakhat ka nei a, chu chu harsatna kan tawh zawng zawngte hlim hmel pu chunga sutkian tum hi a ni. 

Zamin indawm kun mai lo ula, hmalam hun chu êng takin thlir rawh u. Dawhthei takin awm u la, chi ai lo ula, midang ṭanpui turin pen chhuak rawh u. 

He hri leng ṭihbaiawm tak hian keimahnia thil ṭha chu a pho chhuak reng tawh zawk a ni. Mihring chak lohna nei ṭheuh kan ni tih kan inhriat phah a, chhungkua leh ṭhian ṭha hlutzia te, inmamawh tawn vek kan nihzia te kan hre ta. Thil ho te nia kan ngaih, video call mai mai hmangin midang nun kan thlak danglam thei tih pawh kan hre ta. 

Tun hi ṭanrual hun chu a ni; Ina thuawih taka kan awm hian he hrileng hlauhawm tak hi kan hneh thei a ni tih hria ila, engkim a pangngai leh theih nan thawkho ang u. Mi dang ang thoin football-in ka lung a ti leng a, Cibeles-a Real Madrid-in nomawi nena champion an lawm hun ka nghakhlel tawh takzet. 

Mahse, tunah erawh kawtthlera mipui an kir leh theih hun hi ka nghakhlel ber a ni. Chu hnehna chu puan chakin kan bei mek a nih hi.