Miami Open last 16-ah Alcaraz a lut

Carlos Alcaraz chuan season duhawm a hman a chhunzawm, world number 1 hian Pathianni zan khan Dusan Lajovic chu 6-0, 7-6 (7-5) a hnehin Miami Open last 16 a lut.

Spanish rawlthar hian quarterfinal lut tur chuan Tommy Paul a paltlang leh a ngai dawn - season kal lai match 17 a khelh zingah ṭum 16 hnehna a chang thei a, American player lakah pawh rinkai zawk a ni ang.

Kum 19 mi Alcaraz chuan, "Tennis court chhungah nuam ti takin ka che, ka ball vuak leh chet dan hrang hrangah ka lawm, harsatna nei loa inkhelh theih hi chu a nuamin a hlimawm ṭhin," tiin a sawi.

Tournament a khelh hnuhnung Indian Wells-ah Alcaraz hi a champion, tun inelna neih laiah hian nomawi kawl mektu a ni a, world number 1 a nihna humhim tur chuan a title a humhim a ngai dawn.

Inkhel dangah Andrey Rublev, Holger Rune leh Taylor Fritz te chuan an khingpui ṭheuh an hneh ve bawk. Russian tlangval Rublev hian Miomir Kecmanovic chu 6-1 6-2 in a hneh a, seeded pasarihna Rune chuan 6-4, 6-2 in Diego Schwartzman a hneh ve thung.

Rune hian a match lehpekah chuan Fritz a hmachhawn leh dawn. American tlangval seeded pakuana Fritz hian Canadian player Denis Shapovalov chu 6-4, 6-4 in a lo hneh ve bawk a ni.

Hmeichhe singles lamah Elena Ryabkina chuan Paula Badosa 3-6, 7-5, 6-3 in a hneh. US Open champion hlui Bianca Andreescu pawhin Sofia Kenin 6-4, 6-4 in a hneh a, seeded 17-na Karolina Pliskova erawh 6-1, 6-2 in amah ang bawka Czech Republic player Marketa Vondrousova lakah a chak lo.