England tan Kane bawk

Euro 2024 qualifier-a an match hnihnaah England chuan 2-0 in Ukraine an hneh a, Italy laka Three Lions tana goal khung hnem ber record siamtu Harry Kane chuan goal a khung leh ta - ram tana a goal 55-na khungtu Kane bakah hian Arsenal tana season duhawm tak hmangtu Bukayo Saka chuan goal a khung bawk.

Leicester City attacking midfielder James Maddison chuan England tana a vawi khat nan bul ṭanin a khel ṭha viau a, Brentford striker Ivan Toney chu minute 81-naah bench aṭanga lutin, ram tana a match hmasa ber a khel.

England hian Euro qualifier-a an match hmasa pahnihah group C-a an elpui ber tur team pahnih an hmachhawn a, harsatna nei loa an hneh nghal ve ve avangin coach Gareth Southgate-a tan a lawmawm khawp ang. Three Lions hian June international break-ah chuan Malta leh North Macedonia an hmachhawn ang.