Champion lai Bagnaia a chak

MotoGP season thar an tlan ṭan a, rider champion lai Francesco Bagnaia chuan hnehna a chang nghal. Ducati bike khalhtu hian Portuguese Grand Prix aṭanga point hmuh theih sang ber a hlawh chhuak a ni.

Italian rider hian Inrinni khan 'Sprint Race' an siam tharah hnehna a chang, intlansiak pangngaia an tlan chanve chauh an tlan a, hei hi tun season aṭanga an tih ṭan niin, hnehna changtu hian point 12 a hlawh chhuak.

Pathianni zanah Portuguese Grand Prix pangngai tlan chhunzawm a ni a, Italian tlangval bawk hian hnehna a chang nawn. Sprint Race nena a point hmuh belhkhawm chu point 37 a tling, a tan kum bul ṭanna duhthusam a ni ngei ang.

Kum 26 mi Bagnaia chuan, "Intlansiak rei leh zinkawng thui tak a ni. Team leh ka mimal duh dan ang thlapin inelna kan hmachhawn thei a, kei leh ka team tan chuan duhthusam a ni," tiin a sawi.

A hmasa ber aṭanga tlan ṭan Marc Marquez-a'n bul a ṭan fuh tawk lo, kawng kawiah rider dang pahnihin an tlan pel a, insiamṭhat tumin bei chhunzawm viau mah se a hnu lamah Miguel Oliveira nen an intipalh.

Tualchhung tlangval Oliveira hi enkawl chhunzawm a ngai hial a, a hnung lam aṭanga va sutu Marquez pawh a tlan tlang thei ta lo, he thil thlen hnuah hian Bagnaia chuan hmahruaiin hnehna a chan theih phah thung.

Marquez chuan, "Engkim kha keima tihsual a ni a, bike ke hma lam break ka hmang a, ka thlah dul dan a fuh loh vanga chetsualna kha thleng a ni. Oliveira dinhmun a ṭha tih ka hria, tlem chuan ka rilru a nuam deuh," a ti.

Bagnaia hnungah hian Maverick Vinales a thleng a, pathumna chu Marco Bezzecchi niin Johann Zarco chuan a dawt bawk. Gresini Racing a zawn hnua intlansiak a hmachhawn hmasak berah Alex Marquez chu pangana a ni.

Bike intlansiakna sang ber MotoGP hi tun season chhungin intlansiak vawi 21 a awm dawn, inelna pahnihna atan April 2, Pathianni zan dar 10:30 hian Autódromo Termas de Río Hondo tlankawngah Argentina Grand Prix an tlan ang.