James lo kirnaah Lakers chak lo

Thla khat chhung vel hliam vanga a chawlh hnuah LeBron James a inkhel leh thei ta a, mahse James telna Los Angeles Lakers hi nimin zing khan Chicago Bulls lakah 118-108 in an chak lo.

James hi inkhel bul ṭantu zingah a la tel lo, bench aṭanga lutin minute 30 a khel - point 19 a neih bakah rebpund vawi riat a la hman bawk. Lakers player zingah mimala point 20 nei tling thei an awm lo.

Bulls tan Zach LaVine-a'n point 32 a neih bakah DeMar DeRozan chuan point 17 a nei bawk a, tun hnai an match hnuhnung pakua aṭangin ṭum sarih hnehna an chang thei - Lakers hneh tur hian harsatna lian tham an tawk lo tia sawi theih a ni.

NBA Western Con-ferece table-ah Lakers hi pakuana an ni mek, playoff khel phak lo chin chiah an ni, chutih rualin an chunga awm New Orleans Pelicans leh Minnesota Timberwolves te nen match khat lekah an dinhmun a la danglam thei.

Lakers coach Darvin Ham chuan, "Kan mamawh hunah tak James a lo kir, a tirah chuan duhthusama khelh nghal a harsa a ni mai thei, zawimuangin kan chakna hnar a ni leh ang," a ti.

Bulls pawh hian tun dinhmunah chuan playoff an khel phak rih lo - Eastern Conference team 15 zinga 10-na an ni mek, a thiam zual pariat zinga tel tur erawhin an tan kawng a la inhawng.