Spurs leh Antonio Conte an inṭhen
Tottenham Hotspur chuan coach Antonio Conte nen inhriatthiam tawnnaa an inṭhen thu an puang a, Italian coach rorum ve tak hian Spurs-ah hian thla 16 bak hun a hmang hman lo - Spurs coach dang ang thoin nomawi chawi lo bawkin Conte hi a chhuak.
Conte hian Southampton nen an inhnehtawk hnu lawkah khan a player-te chu na taka demin, mahni hmasialah a puh a, Spurs neitu Daniel Levy pawh, "Kum 20 chhung he club-ah hian a awm tawh a, eng nomawi mah an chawi lo," tiin na takin a kap.
Italian coach hian London club chu nomawi chuh phak ve tak tak an nih ngai loh avangin, pressure zo lo leh thil awm dan chu kalphung pangngaia nei tawhah a puh a, hei vang hian Spurs leh Conte inṭhen hi thilmak a ni lo.
Thu leh hla
Conte thlaktu tur atan Spurs hian Italian coach hnuaia assistant manager Cristian Stellini chu an ruat nghal a, season tawp thleng London club a enkawl ang - club midfielder hlui leh first team coach Ryan Mason chuan assistant hna a thawk dawn thung a ni.
Spurs chairman Daniel Levy chuan, "Premier League match 10 khelh tur kan la nei a, season thara Champions League khel turin hmachhawp kan la nei a ni," a ti a, beisei tur nei tawh lo ang maia press hmaa ang chiam Conte an ban chhan a sawi.
Levy chuan, "Kan zavai hian kan thawh ho a ngai a, he club leh rinawm taka min ṭantu fan-te tana a sang thei ang bera season kan khar theih nan theihtawp kan chhuah tlan a ngai a ni," a ti.
Thawnthu ngai
Spurs-in Conte an ban leh takah chuan, kum 2019-a Mauricio Pochettino an ban hnuah an manager nghet palina tur an zawng leh mek tihna a ni a, tun season Premier League bikah manager 11 ngawtin an hna an kalsanna a ni bawk - PL season khata manager an ban hnem ber record a ni.
Manager chhuak 11 zinga pakua chu ban an ni a, a bak pahnih erawh mahni duhthua chhuak an ni. Graham Potter chuan Brighton & Hove Albion chhuahsanin Chelsea a zawm a, tunah Conte-a'n inhriatthiam tawnnain Spurs a chhuahsan ve leh ta bawk.
Kumk 53 mi Conte hi February thla khan a mît (gallbladder) zai a ni a, Manchester City an hneh ṭum pawh khan a team a ho thei lo - match hnih atan a lo kir a, mahse, inenkawl a ngaih zui leh avangin match li dang chu khelmual pawn lam aṭangin team a enkawl a ni.
Conte sulhnu
Italy coach pawh lo ni tawh Conte hian coach a nih hnuah Juventus, Chelsea leh Inter Milan te chu league nomawi a chawipui vek a, Inter-a hna ropui tak a thawh hnuah Spurs hian November 2021 khan beiseina sang tak nen an lalut -a tir lamah talbuai mah se an insiamrem chho a, top four-ah season an khar.
Beiseina sang tak nen season thar an thlir a, mahse, tun season-a league match 28 a kaihhruaiah vawi kua tlawmin, vawi li draw an nei a, FA Cup fifth round aṭanga Sheffield United-in an petchhuah hnuah, Champions League last 16 aṭangin AC Milan-in an pet chhuak ve leh a, league lamah Saints laka 3-1 a hma an hruai reng hnuin 3-3 in an inhnehtawk zui a, tun hi an thleng ta.
Milan-in CL aṭanga an petchhuah ṭum hian fan-te chuan Spurs hi nasa takin an au el hial - Conte thlak tur hian coach hlui Pochettino hming a langsar viau a, Bayern Munich ban tak Julian Nagelsmann hming pawh an lam ri.