F. Zokima a la chuai lo

Yonex-Sunrise 45th Indian Masters (Veteran) National Badminton Championships chu March 26, Pathianni khan khelh zawh a ni ta a, Mizorama badminton ngainatute tan chanchin lawmawm a thleng tel nghal. 70+ Men's Singles category-ah F. Zokima, Chaltlang Lily Veng, Aizawl chu a champion.

Manohar Parrikar Indoor Stadium, Goa-a neih inelnaah hian kum 40 chung lam inelna Men's Singles category-ah Lalmuanawma a lo champion tawh bawk a, F. Zokima'n nomawi a hlawhchhuah leh tak avangin Mizo shuttler-ten nomawi pahnih an rawn hawn.

March 19 aṭanga neih ṭan inelnaah Zotea hian final lut turin semifinal-ah M. Lalu chu 21-14, 21-15 in a hneh a, final-ah Chandran KP chu 15-21, 23-21, 21-19 in deciding game-ah hnehin, champion nomawi Mizoram tan a rawn chawi haw a ni.

Hetihlai hian kum 65 chung lam mixed doubles inelna huangah Lalramliana leh Zokhumi te ṭangdun chuan semifinal an thleng bawk a, mahse, final lut tur zawnna inkhelah Sharada leh Shashidara te ṭangdun chu 12-21, 12-21 a hneh lovin an vanduai a, final an invaw thleng zo ta lo a ni.

He Master Championship a semifinal thleng chinte hian Jeonju, South Korea a neih tur World Senior Championship-ah India ai an awh dawn a, Muanawma, Zotea, Lalramliana leh Zokhumi te hi India aiawhin an feh chhuak dawn tihna a ni.

Mizoram Badminton Association chuan thuchhuah siamin, "Mizoram player hlawhtlinna chang te, national level-a champion theite bakah he inelnaa tel phakte hi kan chhuang takzet a, an hlawhtlinnaah kan lawmpui a ni," an ti a, an hma lam hun atan duhsakna an hlan bawk.