Ronaldo-a'n goal a khung zel

Cristiano Ronaldo chuan Portugal tan goal a khung chhunzawm zel. Pathianni zan khan Portugal chuan Stade de Luxembourg an luhchhuah a, mualneitu Luxembourg chu 6-0 in an sawp. Real Madrid leh Manchester United forward hlui Cristiano Ronaldo-a'n goal hnih a khung a, Portugal goal hmasa ber hi a khung a ni.

Portugal tan Ronaldo-a'n goal hnih a khung bakah Joao Felix, Bernardo Silva, Otavio leh Rafael Leao ten goal khat ṭheuh an khung. Al-Nassr forward Ronaldo hi minute 65-naah lakchhuah a ni a, chhuak lo se chuan hattrick a siam ngei ang. Bench aṭanga lut Milan forward Leao chuan goal khat khung mah se penalty a hlah.

Ronaldo hian goal a khung apiangin record a siam zel a, tunah hian ram tan goal 122 khung tawhin Lionel Messi aiin goal 23-in a khung tam zawk. Portugal hi ram tana khel tam ber a ni bawk a, ram tana vawi 200 khel tling turin match hnih chauh a mamawh tawh a ni.

Euro qualifier-ah Portugal hian match hnih an khelh tawh aṭangin point ruk an hmu a, group J-ah hmahruaitu an ni mek. Roberto Martinez hote hnuaiah hian Slovakia (4 pts), Bosnia-Herzegovina (3 pts) leh Iceland (3 pts) te an awm a, group khat aṭangin team pahnihin Euro 2024 an khelh dawn avangin Portugal dinhmun a ṭha nghal hle.