Vawiinah MBA Finals ṭan a ni dawn ta

Mizoram chhunga Badminton inelna ngaihhlut hlawh leh pawisa tamna ber, season khat chhunga a thiam pariatte inelna MBA Finals chu vawiinah hian Champhaiah khelh ṭan a ni dawn ta.

Champhai District Bad-minton Association-in a thlen tur inelna hi Champhai Town Hall-ah neih a ni dawn a, inelna hi category pangaah ṭhen niin, Men's Singles, Women's Singles, Men's Doubles, Women's Doubles leh Mixed Doubles ah te inelna neih a ni dawn a ni.

Men's singles inelna huangah seeded no. 1 ni chunga inelna hmachhawn tur Malsawmsanga (Esh-a), Bawngkawn Badminton Club chu en bik hlawh tur a ni dawn a, BBC tan thoa khel, Pullela Gopichand Badminton Academy a inzir mek Saitluangpuia Sailo chu seeded no 2 niin, ani pawh en bik hlawh tur zinga mi a ni.

Women's singles lamah Saron BC tana khel Abigail Lalṭhazuali, chu seeded no. 1 niin, Ralte Villa BC tana inlan tur Lalrempuii, Ralte Villa BC chu seeded no 2 a ni dawn thung.