Rilru leh taksa a inpeih tawh - Lianzuala
Hero Tri-Nation International Football Tournament khelh mekah India chuan zanin dar 6:00 hian Kyrgyz Republic an hmachhawn dawn a, Mizo forward Lallianzuala Chhangte chuan inkhel tura a inpeih tawh thu Vanglaini a hrilh.
Lunglei tlangval chuan, "Inkhel turin kan inpeih tawh a, chak ngei ngei a ngai dawn a ni. Team pumpui pawh thlir ila, rilru leh taksa ang zawng pawhin thlir ila, kan ṭhat ber lai vek niin ka hria.
"Chak ngei tumin kan khel dawn a, India mipuite tana ennawm hmuhnawm tak chhawpchhuah kan tum a ni," a ti a, mikhual Kyrgyz Republic lakah zahngaihna lantir an tum loh thu a sawi.
ISL Golden Ball kawltu Lianzuala chuan, "Mizoram mipuite ṭawngṭainaah min lo hre leh turin kan ngen duh a ni," a ti a, Vanglaini kaltlangin Mizo mipuite ṭawngṭaipuina a ngen.
India hian an match hmasa zawkah Myanmar chu 1-0 in an hneh tawh a, zanina an hmachhawn tur Kyrgyz Republic hian Myanmar hi an inhnehtawkpui avangin India tan nomawi chawi turin draw a tawk.
Blue Tigers coach Igor Stimac-a'n Myanmar lakah fimkhur takin 4-2-3-1 formation a rawn hmang a, zaninah pawh he formation bawk hi Croatian coach hian hmang leh tura ngaih a ni.
Chuti a nih chuan tlarhmaah Sunil Chhetri a mal tlat leh ang a, mual sir aṭangin Lianzuala leh Bipin Singh ten an nawrpui leh ang. Chhetri hnungah Mohammed Yasir nge Brandon Fernandes-a'n bul ṭan zawk ang, tih erawh rinthiam a harsa.
Midfield-ah chuan Anirudh Thapa leh Manipur midfielder Jeakson Singh bawk inkawp leh tura ngaih an ni a, Anirudh hi tawlh hma hretin Jeakson-a'n tlarhnung a venpui thei ang.
Tlarhnung laiah Chinglensana Singh leh Mehtab Singh an rintlak ṭhin a, Stimac-a tan full back pahnih Akash Mishra leh Rahul Bheke thlak a harsa mai thei bawk. Chutihrual chuan friendly match a ni a, Croatian coach tan a player-te theihna enkual hun lai tak a ni.
Myanmar laka bul ṭan keeper Amrinder Singh erawh chawl hahdam tawh tura ngaih a ni a, chuti a nih chuan first choice keeper Gurpreet Singh Sandhu chu si ban nghak tura beisei a ni.
FIFA ranking-a 106-na India tan 94-na ni phak Kyrgyz Republic lakah fimkhur a finthlak ang tih a chiang a, Kazakhstan club Aksu midfielder Kayrat Zhyrgalbek uulu, Belarus Premier League club Neman Grodno midfielder Alimardon Shukurov, Malyasian Super League club Kelantan United striker Ernist Batyrkanov te hi ngaihthah an thiang lo.
I League club Moham-medan SC forward Mirlan Murzayev hi Indian football hrechiangtu a ni a, ISL-ah pawh Chennaiyin tana lo khel tawhin, zaninah en bik a sual lo ang.