Khawzawl nula Chhani'n GOLD a chawi chhuak

4th Khelo India Senior, Junior & Youth National Ranking Women's Tournament chu Sree Kanteerava Stadium, Bengaluru-ah neih mek a ni a, Mizo nula Lalchhanhimi chuan 76 kg senior category-ah gold medal a chawichhuah bakah national record a siam tel bawk.

Khawzawl nula Chhani hian Snatch-ah 91 kg chawiin Clean & Jerk-ah 124 kg a chawi a, category chi hniha a chawi zat belhkhawm hi 215 kg a ni. Clean & Jerk bikah Chhani hian national record thar a siam.

National Centre of Excellence (NCOE), Bengaluru-ah Chhani hi a awm mek a, tun ṭuma a telna senso zawng zawng hi Directorate of Sports and Youth Services Department, Mizoram chuan an tumsak a ni.

Kum 2019 khan 71 kg-ah clean & jerk (122 kg) leh snatch (95 kg) ah record a siam a, January thla khan clean & jerk bika record hi an khumsak a, snatch bika a record erawh a la ding zel.

Chhani hi 71 kg category aṭangin 76 category-ah a insawn a, a chhan chu National Games-ah 71 kg category a awm loh vang a ni.

Tun ṭumah hian 76 kg category-a Clean & Jerk-ah 124 kg a chawi a, record thar a ni. Snatch-a record dinglai erawh 100 kg a ni a, Chhani tan hmasawnna tur a la awm. Chhani hian 71 kg category-a a record chu hum thei tawh lo mah se weight sang zawk 76 kg category-ah record thar a siam.

Khawzawl nula Chhani chuan, "Pathian khawngaihna zarah kum ṭha tak ka hmang. Kumin ringawtah gold ṭum thum ka la tawh a, hmasawn zel ka tum. Mizo mipuite min ṭawngṭaipui zel turin ka ngen a che u," tiin Vanglaini a hrilh.

Weightlifting-ah hian Chhani hian sulhnu ṭha tak a nei a, Commonwealth Championship 2021 (Uzbekistan)-ah khan bronze medal a la. Nikum leh kuminah Senior National C'ship-ah gold medal a la ve ve a, March thla khan Khelo Ranking inelna hi awm bawkin gold medal a la tawh bawk.