Zaninah MSL Finals Game 2; Thih leh dam kara leng Zarkawt BCA

Zarkawt BCA tan Mizoram Super League nomawi an kawl lai humhim turin chetsual a thiang tawh lo. Zanin dar 8:00 hian MSL8 Finals Game 2 khelh a ni dawn - BCA hian Khatla TBL lakah hnehna chan ngei an tum ang.

Finals Game 1-ah BCA hian TBL an ngam lo, best of three hmanga chak zawk zawn a nih avangin team pahnih tan kawng a la inhawng. BCA coach Lalruatfela chuan an nomawi humhim turin theihtawp an chhuah dawn tih Vanglaini a hrilh.

Khatla TBL manager

H. Lalhruaitluanga'n game 3 khelh ngai loa chak tlang an tum thu a lo sawi tawh thung a, team enkawltu pahnih thil tum a inang lo. Tuin nge thluak vawrh vir thiam a, ruahmanna siam fuh zawk kan hmu dawn - a hmuhnawm ngei ngei ang.

A tawi zawnga sawi chuan, zanin hi Khatla TBL tan nomawi 'chawi' theihna hun a ni a, an khingpui Zarkawt BCA tan erawh nomawi 'hloh' theihna hun a ni thung. Zarkawt club an chak ve leh thung a nih chuan, March 30, Ningani zanah champion chinfel a ni ang.

Kawng a awm

Tualchhung basketball inelna sang berah Zarkawt BCA hian a zawnin nomawi vawi li an chawi thei a, an ṭhatzia inhrilh nawn a ngai lo. Season hmasa pawh khan final match hmasa berah an chak lo, mahse a hnuah tho chhuakin an champion.

BCA coach Afela chuan, "Kawng chu a la inhawng, kan tan inelna a la tawp lo. Chuvangin theihtawp kan chhuah leh dawn a ni. Game 1-ah kan khel ṭha tawk lo, a bik takin basket kan neih theih tura kan ngaih kan hlah nasa.

"Insiamṭhatna hun a awm, ka naute hi tawnhriat nei ṭha tak tak an ni hlawm a, inkhel boruak sang hmachhawn dan pawh an thiam, chuvangin game 2-ah chuan hnehna chan ngei tumin theihtawp kan chhuah ang," tiin Vanglaini a hrilh.

Tun season MSL bikah team pahnih hi vawi thum an inkhel tawh, league round bikah BCA an chak ve ve, heng inkhelah pawh hian point hnih leh point thum chu an chakna a ni, tun ṭuma TBL chakna pawh point thum chauh a ni a, an inhnaih thei hle.

Danglamna

Zarkawt BCA coach Afela'n player khel ngei ngei tur a sawi chiang thei rih lo a, mahse player ṭhenkhat khelh hun chhung erawh a danglam deuh tawh dawn tih a sawi thung, game 1 nen chuan an khelh dan phung a danglam hretin a rinawm.

Tawnhriat ngah H. Laldinsanga'n Joshua Keys a veng thei viau a, American player hian point a ngah lo. An khingpui hmanraw pawimawh an ven uluk hi an tihmakmawh a ni, chutih rualin match hmasa lama an point neih hnem ang erawh an nei ta lo.

Afela chuan, "Hnehna chang tur chuan basket kan neih hnem a ngai, kan khingpui hi team ṭha an ni a, chuvangin mahni inven bakah na taka nawr kan tum dawn a ni," a ti. Zarkawt BCA hian an khelh fuh ni chuan point 100 neih tlin an harsat lo hle.

Tun season MSL khelh laiah team an ṭha tlang a, kum dang zawng aiin point an nei hnem ṭhin. BCA chauh ni loin Khatla TBL pawhin point an nei hnem tlangpui, zaninah game inhawng leh hmuhnawm zual zawk - point tamna inkhel kan hmuh theih a beiseiawm.

A hmuhnawm dawn

MSL8 Finals Game 1 tawp dawna Vanlalṭhazuala 3-points neih khan sawi zui a hlawh, team pahnih inhnehtawk lai hun tawp dawn hnai boruak a ni bawk si, zaninah pawh Thazuala hi Khatla TBL lam hmachhuan a ni leh dawn, boruak sang a ngam tih chu hriat sa.

Vawi hnih champion tawh an nih miau avangin TBL hi dah hniam theih an ni lo. Coach Vanlalnunsanga hi player a nih laia champion boruak tawng tawh a ni a, manager H. Lalhruaitluanga pawh Mission Veng Vikings champion pui tawh a ni bawk - an tan MSL final hi thil thar a ni bik lo.

Team pahnih danglamna a tam lo kan tih tawh kha. Lalrina Renthlei-in 3-points a shoot kha lut ni se chuan game 1 result kha a danglam mai thei. BCA coach Afela chuan, "A lut ngei dawn emaw ka ti hman," a ti, zaninah Tuikhuahtlang star hian hlah nawn a tum lo ang.

Captain Matthew Remtluanga Sailo (Pupua) hi Zarkawt tlangval a ni a, veng mi a nih vang ngawta captain dinhmun chelh a ni lo tih chu inkhel en ṭhinten an hria. Pupua leh Zonunsanga ten ngai an awh leh a nih chuan TBL tan pawh dan an harsa dawn tih chu sawi lawk ngam a ni.

A hmun boruak

Mizoram Super League season 8 hi R. Dengṭhuama Indoor Stadium, Mualpuiah vek khelh a ni. Zanin game 2 pawh hi a hmun ngaiah khelh a ni dawn, inkhel ṭan hun dar 8:00 ni mah se ṭhutna ṭha chang duh tur tan kal hma a fuh ang.

Khatla TBL lamin fans an ngah ṭhin, an ṭhutna tur hmuna leng lo khawp an kalkhawm fo - zaninah an chak a nih chuan nomawi an chawi thei dawn, chuvangin Khatla TBL ṭantu mipui an fuankhawm hnem dawn.

Zarkawt BCA hian season hmasa an boruak an la phak lo deuh niin a lang, tun hun hi player leh coaching staff lamin fans thlawpna an mamawh zual hun chu a ni. Nikum ang bawka 'comeback' an duh a nih chuan Zarkawt veng mipui tan chet chhuah hun a ni.

A hmuna kal ten inkhel hmuhnawm bakah a boruak an hlep ṭhin. Mualpui pan thei lo tan Zonet Zawlbukah live-a pek chhuah a ni dawn. TV lama en thei lo tan Zonet YouTube-ah en theih a ni, member only a nih avangin thla khat atan Rs 199 chawi a ngai thung.

Tualchhung basketball boruak a nung a, inkhel a hmunawm ṭhin bawk. Mahni in lum aṭanga en theih ni mah se, a tuichilh tak tak tan chuan a hmuna kal tluk a awm thei lo.