Mizoram Police-in mellung thar an phun
71st Bn Mullik Memorial All India Police Football Championship-ah Mizoram Police chuan nimin khan Punjab Police chu 2-1 in an hneh a, a vawi khat nan final an thleng. Vawiin chawhnu dar 1:30 hian Assam Rifles nen Bakshi Stadium, Srinagar-ah an inkhel ang.
Nomawi hlu bik
Mizoram Police hian tun hmain nomawi ṭhahnem tak an chawi tawh ṭhin a, Mizoram football-ah an chungnung ṭhin. Tualchhung club tan tehfung atan hman an ni a, Police hneh chu sawi loh Police draw pawh result ṭha a ni.
MPL hmasa ber ṭan hmain Police hi I Day Football-ah an champion a, Mizoram chhunga football inelna sang berah pawh champion rinkai an ni. Mahse, MPFC hian All India Police Meet an khelh avangin hun pawimawhah point an hloh a, Dinthar FC lakah nomawi an chân.
Police hian tun thlengin MPL nomawi an la chawi thei lo a, nomawi chawi hrim hrim pawh an harsat. Nikum khan I Day Football-ah Police an champion a, MPL hnuhnung berah champion rinkai ni mah se Invitation Tournament an khelh avangin semifinal pawh an thleng pha lo.
MPL nomawi meuh chân huamin Police hian All India Police Meet hi an khel tawh ṭhin a, an tan nomawi hlu bik a ni. Tun ṭuma final an thleng thei pawh hi Police chhungkua tan chuan chanchin lawmawm a tling.
Inelna chu
Police an vannei a, 1st Bn MAP Football Ground-ah articial turf an phah hman. Lalbiaksanga Colney hoten ground ṭhaah training-na ṭha tak an nei thei a, inelna hmachhawn turin an inpeih.
Mizoram Police hian group stage-ah Gujarat (9-1), Jharkhand (5-1) leh Madhya Pradesh (6-0) te an hneh vek. Last 16-ah Assam Police chu 2-0 in an hneh a, quarterfinal-ah BSF chu 2-1 in an hneh leh bawk.
Nimin khan semifinal-ah Mizoram-in Punjab Police 2-1 in an hneh a, H. Lalbiakthanga'n minute 42-naah hmahruaina goal a khung. Second half ṭan aṭanga minute thumnaah Mizoram tan Lalnunsanga'n (Tale-a) a khung belh a, Punjab hian injury time-ah an khung leh chauh.
Mizoram coach BS-a Colney chuan, "Pathian min awmpuina vang a ni a, hlawhtlinna kan chan theih nan team chhung discipline a ṭha bawk. Final atan Mizo mipuite min ṭawngṭaisak turin kan ngen tak meuh a ni," tiin Vanglaini a hrilh.