Ramhlun Venglai an chungnung ber

Tualchhung cricket inelna ngaihhlut Mahuma Memorial First Division Screening 2022-23 champion chu Ramhlun Venglai an ni. Inrinni khan RVL hian Zarkawt Lords chu run 195 tehmeuhin an sawp.

Mahuma Memorial bikah Ramhlun Venglai hi a kum zawnin an champion a, kum 2007 leh 2012 te khan nomawi an lo chawi tawh bawk - an sulhnu a ṭha hle, a hlutna tizualtu chu anmahni chherchhuah player hmangin an champion ṭhin.

Suaka Cricket Ground-ah first division final hi khelh a ni a. Zarkawt Lords-in vawm hmasak an thlang. RVL batsman-te an che ṭha a, opener C. Vanlalhruaia chuan run 84 siamin Joseph Lalthankhuma'n run 57 a siam.

Midang pangain run sawm aia tam thawh ve hlawm bawkin RVL hian over 50-ah run 261 an siam a. Zarkawt Lords bowler zingah Rinsangzela che ṭha berin wicket thum a la.

Ball nen pawh RVL an che ṭha leh tho, a tir over 12 chhungin wicket pawimawh panga an la hman. Zarkawt Lords tan Tleipuia'n run 23 a siam tih loh chu run tih tham siam an awm lo. Over 19.1-ah run 66 siamin an out zo.

Tournament chhung zawnga run 321 siamtu C. Vanlalhruaia chu Best Batsman a thlan a ni a. Match sarih aṭanga wicket 19 la thei Rinsangzela chu Best Bowler niin Man of the Series a thlan a ni bawk.