Chelsea leh Spurs ten point hnih an hloh

Premier League nomawi beisei ngam tawh lo mah se Tottenham tan 'Champions League tal' tih a ngai a, Chelsea tan 'European football hrim hrim' tih a ngai thung. London club pahnih hian point mamawh viau mah se Inrinni zan khan an chak zo lo ve ve.

Chelsea hian Everton lakah ṭum hnih ngawt hma hruai mah se an humhim thei lo a, 2-2 in an inhnehtawk. Spurs pawhin dinhmun ṭha taka an hmahruaina an humhim thei lo - Southampton nen 3-3 a inhnehtawkin point hnih an hloh.

Potter-a Chelsea

Chelsea hian tun hnaiah Leeds United, Borussia Dortmund leh Leicester City te an hneh vek. Stamford Bridge-a inkhel an ni bawk a, a hnuai lama talbuai Everton lakah Blues hi chak turin an buk a rit nalh, goal pawh an nei hmasa.

Second half tir lamah loan hmanga an hawh Joao Felix hmangin hma an hruai a, mikhual lamin Abdoulaye Doucoure hmangin an sut. Kai Havertz-a penalty hmanga an hmahruai vawi hnihna pawh hun tawp dawnah Ellis Simms hmangin an sut zo.

Chelsea lamin an chak zawh loh chhan hrang hrang an ngaihtuah a, chung zingah chuan manager Graham Potter thutlukna mawhpuhtu an awm nual. Potter-a'n Chistian Pulisic leh Wesley Fofana te a lak chhuah hlimah ve ve goal an chhuah.

English manager Potter chuan, "Point thum kan hmu dawn emaw kan ti hman, mahse goal kan venghim ṭha lo a nih chuan chak ngawt theih a ni lo. A bik takin box chhungah ball kan kan hloh nasa, a hlauhawm tawh ṭhin a ni," a ti.

Premier League table-ah Blues hi 10-na an ni mek, tun thlatira an dinhmun nen a la pangngai reng. Everton tan erawh point khat chauh hmuh belh pawh a hlu - Sean Dyche-a naute hi tla thei china awm West Ham aiin point hnihin an sang.

Conte a lungawi lo!

Pedro Porro, Harry Kane leh Ivan Perisic te hmangin Tottenham hian goal an khung hmasa. Mahse, table mawngphah luahtu Southampton lamin Che Adams, Theo Walcott leh James Ward-Prowse te hmangin an sut vek.

Spurs hian an duh ang takin an khel thei lo ve bawk - hliam vangin Richarlison leh Ben Davies te thlak an ngai. Amaherawhchu, hun tawp dawn minute 15 chauh awm tawha goal hnihna an hmahruaina an humhim thei loh vangin Conte a thinur.

Italian manager Conte chuan, "Khelmual chhungah player 11 an ṭangrual tur a ni a, mahse mahni hmasial taka khel ka hmu, mahni ṭhiante tana hun ṭha siamsak hreh tak an awm," a ti a, club neitu lamin boruak sang leh hautak hmachhawn an ngam tak tak lo tih a sawi bawk.

Conte hian tun season tawp thleng daih bak contract a nei tawh lo, a pawhsei a rinawm ta lo hle. Club chairman Daniel Levy hnuaiah kum 20 chhungin hlawhtlinna lian chan an nei lo, kum 2008 a League Cup an lak bak sawi tur an nei lo a ni.

Levy hnuaiah manager hrang hrang 11 zet an nei tawh. Champions League final a luhpui aṭanga thla ruk hnu lekah Mauricio Pochettino an ban a, a kalna lam apianga champion ṭhin Jose Mourinho meuh pawh League Cup final hmain an ban - Conte chuan club neitu lam a sawisel ta hmiah mai.