Final khel turin Zarkawt BCA tlang; Khatla TBL tan match khat a la ngai
Mizoram Super League champion lai Zarkawt BCA chuan an nomawi kawl lai humhim ngei an tum, league hmahruaitu an nihna chu semifinal-ah pawh a takin an lantir a, harsatna nei loin Bungkawn LB Associates an paltlang.
Final khel turin Zarkawt BCA an tling chiang ta a, an khingpui tur erawh a la chiang lo. Khatla TBL leh Mission Veng Hotshots inkhela chak zawk nen MSL8 nomawi an inchuh chhunzawm leh dawn a ni.
Semifinal leh lamah Khatla TBL chuan Mission Veng Hotshots chu 97-66 a hnehin, best of seven series-ah 1-0 in hma an hruai. Zanin dar 8:00 hian R. Dengṭhuama Indoor Stadium, Mualpuiah game 2 an khel dawn.
BCA nge nge
Inrinni zan semifinal game 2 inkhelah Zarkawt BCA hian Bungkawn LB hi 88-78 in an hneh a, best of three series chu 2-0 in an la, tun hnaiah a zawnin vawi nga ngawt Mizoram Super League an khel dawn tihna a ni.
BCA an chak theih nan captain Matthew Remtluanga Sailo chu a hunah tak a inlar. Pupua hian point 25 ngawt a nei a, an chakna hnar pawimawh a ni. Lalrina Renthlei chuan point 21 a neih bakah rebound vawi 11 lain double double a nei bawk.
Champion lai Zarkawt BCA coach Lalruatfela chuan, "Bungkawn LB kha hmachhawn an harsa hle, mahse hla tak aṭanga basket an neih ṭhin kha kan veng thei a, chu chu kan chakna hnar a ni," a ti a, an hneh tak hi league round lama an ngam loh awmchhun kha an ni.
LB player ṭha Everrett Lorenzo Pleasant chu Lalsangkima leh Zonunsanga ten an veng uluk viau a, boruak san deuh rap rap chang pawh an nei. BCA coach Afela chuan chak duh vek an nih avangin an boruak chu sang mah se an siamṭhat a beisei thu Vanglaini a hrilh.
TBL hmabak
Mizoram Super League season hmasa pahnihah Khatla TBL an champion a, a hnu lamah erawh nomawi an la chawi leh thei rih lo. Ram pawn aṭanga an chah luh Joshua Keys chu an player pawimawh a nih rualin, tualchhung player an hmang thiam hle.
Semifinal game 1-ah TBL tan Vanlalṭhazuala'n point 31 neiin a sang fal - Mission Veng Hotshots lamin Keys an ven luatah Ṭhazuala hian remchang a neih hnem phah, point 19 neitu Vanlalrinchhana a langsar hle bawk.
Final lut turin TBL dinhmun a ṭha, vawi khat chak chauh an hmabak ta. Chutih rualin Hotshots tan erawh zanin an inkhel tur hi thih tha a beih a ngei thung, an chak loh chuan an tan MSL8 zinkawng a tawp chhunzawm nghal dawn.
Hotshots thiampuipa Christopher Galbreath Jr a thawh-hlawk ṭhin, game 1-ah pawh point 38 a nei. Mahse, tualchhung player zingah amah thlawp ṭhatu a hmu meuh lo, point 10 nei tling thei an awm lo - ball pek tam lehzual bakah basket lo neih ve zeuh theih a pawimawh ang.