Terina & Puitea awmna Bagan an champion
"Thawm a bengchheng lutuk a," tiin Lalrinliana Hnamte chuan Vanglaini biakna a chhang a, hetihlai hian ISL champion ATK Mohun Bagan-in Kolkata khawpui an lut mek a, fans sang telin hmuakin an lo lawm. K. Lalṭhathanga (Puitea) chuan, "Nizan aṭang khan kan la mu miah lo," tiin Vanglaini a hrilh bawk - a hlimawm em a ni, an demawm lo e.
Inrinni zan khan Indian Super League final-ah ATK Mohun Bagan leh Bengaluru te chu hun pangngaiah 2-2 in an inhnehtawk a, penalty hmanga chak zawk zawn a nih hnuah 4-3 a Bagan chakin an champion.
Final chu
Jawaharlal Nehru Stadium, Goa-a inkhelah Bagan-in goal an khung hmasa zawk a, Roy Krishna handball vanga an penalty hlawhchhuah chu Dimitri Petratos chuan minute 14-naah hmahruaina goal ni turin a chhuih lut.
Mahse, Bengaluru an ngawi rei lo. Penalty chawitu Krishna-a'n first half hun pek belhah penalty hlawh chhuak ve lehin, Sunil Chhetri chuan goal-ah a chantir a, minute 78-naah Krishna hian a belhchhah bawk.
Krishna goal khung hun ngaihtuah hian Bengaluru hi an chak mai dawna rinna a lian hman. Mahse, hun tawp nan minute nga chiah a awm tawh tihah Kiyan Nassiri chuan Bagan tan penalty a hlawh chhuak ve leh a, Petratos bawk lo pen chhuakin, goal-ah a chantir.
Chun leh zua tan
Minute 90 chhung 2-2 a nih avangin extra time khelh a ni a, minute 120 hnuah pawh a luh belh chuang lo. Penalty hmangin chak zawk zawn a ṭul a, Bagan tana pettu paliin an chhuih luh vek laiin, Bengaluru tana Bruno Silva pet chu Vishal Kaith chuan dansakin, Pablo Perez chuan a thlawh over bawk a, 4-3 in Bagan an chak.
Season hmasa khan Terina'n a professional career ṭanin East Bengal tan a khel a, tun season-ah squad chhah ṭha Bagan a zawm a, a champion nghal - final-ah hian minute 46-naah luhtir a ni. Terina chuan, "Kan chak kha chuan ka mitthlaah ka chhungte an lo lang nghal a, ka nu leh pa hlim hmel tur ka mitthla nghal.
"Phone kan lak veleh ka be nghal nghe nghe a ni. Chak phu zawkin hnehna kan changah ka ngai a, vanneih ṭum ni se, penalty pet kher kha a ngai lo ang," a ti a, Terina chuan sawi zawmin, "Inkhel thei tura hriselna ṭha min petu Pathian chungah lawmthu awm se. Engtiklai pawha min thlawptu Dungtlang khaw mipui leh Chanmari veng mipuite chungah lawmthu ka sawi bawk a ni," tiin Vanglaini a hrilh.
A mak asin
Season hmasa khan Puitea'n Kerala Blasters tana khelin, final a lut a, mahse, a vanduai zawkah an ṭang. January transfer-ah Puitea'n Bagan a pan a, a professional career-a a vawi khat nan champion nomawi a chawi.
Puitea chuan, "Sawi vak ngaihna pawh ka hre lo - ka lawm a ni tawp mai. Nikum lamah a vanduai zawkah ka lo ṭang tawh a, season chawlh lai aṭanga trainer-te lain theihtawp ka chhuah a, Pathian zarah ka thawhrim rah ka hmu ta niah ka ngai. Keima mimal bikah season harsa ka tih ber a ni a, kan champion thei hi Pathian awmpuina ka chang a ni," tiin Vanglaini a hrilh.
Bethlehem Vengthlang tlangval chuan sawi zawmin, "Season chawlh laia rim taka min training puitu Biakzuala Khenglawt (Gtea) chungah lawmthu ka sawi a, ka chhungte, kan veng mipui leh Mizoram aṭanga min ṭawngṭaipui ṭhintu leh kan chanchin ngaihven ṭhintute chungah pawh ka lawm - Lianzuala pawh ka lawmpui hle," a ti bawk.