PSG 0-1 Bayern : A la zo lo

FC Bayern Munich-in Paris-ah mual neitu Paris Saint-Germain chu 1-0 in an hneh a, goal khungtu hi 2020 Champions League final-a goal awmchhun khungtu Kingsley Coman tho a ni.

German champion hian Champions League last 16 first leg-ah 1-0 in hnehna an chang a, second leg hi March 8, Nilaini zan hian Allianz Arena-ah khelh a ni leh dawn. Player ṭha chungchuang Lionel Messi, Neymar leh Kylian Mbappe te tan beisei tur a la awm.

Fapa tlanbo

Kum 26 mi Coman hian kum 2015 aṭang khan Bayern tan a khel tawh a, German club tana khelh hi a inhmeh tawh. Mahse, Coman hi a chanchin chhui zau hret chuan Paris-a piang a ni a, inkhel bul a ṭanna pawh PSG a ni.

Coman hi first half-ah PSG tlarhnung tan a hnawksak a, minute 53-naah Alphonso Davies-a cross chu goal-ah a chantir leh bawk. French forward Coman hian a goal khung hi a lawm duh lo a, a ban pahnih phar chhuak nghalin amah siam liantu a hre reng.

Goal awmchhun khungtu Coman hi player ropui bika sawi ṭhin ni lo mah se a record erawh a ropui bik. Coman hian PSG tan Ligue 1 nomawi vawi hnih a chawi hman a, Juventus-ah kal lehin Serie A nomawi vawi khat a chawi a, Bayern a zawm hnuah a champion char char bawk. French forward hian kum zawnin league nomawi 10 a chawi tawh a, 11-nain a nghak mek!

Bayern an ṭha

Parc des Princes-ah Bayern an inthlahrung lo a, captain Joshua Kimmich chu midfield-ah a ṭangkai. Tlarhma lamah Jamal Musiala a hmuhnawm a, PSG tlarhnungin ven harsa an ti hle.

Bavarians hi an vanneih ṭum ni se, goal dang pawh khung thei an ni. Musiala hnathawh ṭha zet chu Eric Maxim Choupo-Moting-a'n goal-ah pet mah se keeper Gianluigi Donnarumma-a'n ṭha takin a dang.

A la tawp lo

PSG tan Neymar leh Lionel Messi ten bul an ṭan a, hun chanve hma lamah an goal bawh a na tawk lo. Amaehrawhchu goal an chhuah hnuah Kylian Mbappe chu minute 57-naah an luhtir a, PSG tlarhma 'trio' a kim ta chiah.

Inkhel chawhnu lam chu PSG chan a ni ta thung a, Bayern tlarhnungin Mbappe dan harsa an ti hle. French forward goal khung tur chu Yann Sommer-a'n a dansak a, hemi per hi Neymar-a'n a hmang ṭangkai thei lo. Keeper dan per chu Mbappe-a'n goal-ah a chantir a, mah se chiang takin a offside.

Minute 82-naah Neymar through ball chu Nuno Mendes-a'n um lutin a ball pek chu Mbappe-a'n goal-ah a chantir. VAR hmanga ennawn a nih hnuah Mendes a offside tih a lang a, Mbappe leh PSG an vanduai.

Hun tawpah Messi-a'n ding lam aṭanga ball lalutin Benjamin Pavard-a'n a tlawh thlu a, French defender hian yellow card vawi hnihna hmuin hnawhchhuah a ni.

Allianz Arena-ah Pavard a khel thei dawn lo a, PSG tan Messi, Neymar leh Mbappe ten bul an ṭan thei dawn bawk. Bayern-in 1-0 in hma hruai mah se minute 90 khelh tur a la awm a, quarterfinal lut tur a la chiang lo.