GIG Motors Mizoram Fight Night a hlawhtling

GIG Motors Mizoram Fight Night chu Nilaini zan khan Dawrpui Multipurpose Centre-ah a ṭiak ta. Aizawl District Boxing Association leh Zonet buatsaih inelna hi a hlawhtling a, final zanah hall-a leng lo mipui an pungkhawm a ni.

Fight Night-ah hian mipa boxer 116 zet an tel a, mipa tan hian category panga a awm. Tuipui tlangval Lallawmawma chu best boxer-ah thlan a ni. Hmeichhe lamah category pathum awmin boxer25 an tel a, ITI Veng nula Lalrinchhani chu best boxer-ah an thlang.

Category tina champion hian belt an dawng vek. Mipa champion hian Rs 20,000 dawngin pahnihnain Rs 10,000 an dawng. Hmeichhe champion hian Rs 15,000 an dawng a, pahnihnain Rs 5,000 an dawng ve bawk.

Mizoram amateur boxing inelna lianah Siaha District-a awm Niawhtlang tlangval pahnihin final an thleng thei hi a ropui danglam hle.

Flyweight final-ah kum upa leh tawnhriat ngah zawk Lalzaenpuia'n hnehna a chang a, inhnek zawhah HC Rama chu a zirtir a nih thu a sawi.

Zaenpuia chuan, "Boxing inelnaah medal ka la la ngai lo. MIZBA Boxing Hall-ah boxing kan zir ṭhin a, hmun danga zir turin pawisa kan nei lo. Tun ṭuma kan chunga thil thleng hi Pathian thil tih mak a ni," tiin a sawi.

Niawhtlang tlangval hian Aizawlah inluahin, ni tin inhlawha eizawng chawp a ni a, tun dinhmun thleng tura a tawrhchhelna leh inpekna hi infiammi dang tan entawk tlak a ni.

Featherweight-ah tawnhriat nei ṭha, Tuipui tlangval Laldinmawia chuan Lunglei Salem Veng tlangval Franky H. Vanlalruatpuia chu unanimous decision-in a hneh a, judge pathumin round khat tih loah chuan Dinmawia hi an chaktir vek.

Mahse, judge-te thutlukna hi entu mipuiin an ṭawmpui lo a, 'blue corner' tiin an au rual. Dinmawia chuan, "Mi tam zawkin i upa tawh lutuk min ti a, eng nge inhmuh," tiin champion belt chu a khai kang a, Tuipui tlangval chuan a belt chu kawh pahin, "A lehpekah pawh ka rawn la leh dawn," a ti.

Boxing ngainatuten Mizoram Fight Night vawi hnihna an nghakhlel sawt ang.

Lightweight-ah Tuipui tlangval Lallawmawma'n Haulawng tlangval Lalnunzira chu unanimous decision hmangin a hneh a, National Boxing C'ship hnuhnung bera bronze latu hi mipa best boxer atan thlan a ni bawk.

Lawmawma hian tun hmain Zira hi a la hneh ngai lo a, State Games-a an intawn ṭum pawhin Haulawng tlangval hneh loh vangin medal a la phak lo. Fight Night-ah erawh Lawmawma'n hnehna a chang a, Tuipui boxer pahnih an champion.

Best boxer Lawmawma chuan inhnek zawhah Pathian leh amah ṭantute chungah lawmthu a sawi a, inkhelh bana Vanglaini palaiin zawhna a zawh pawhin lawmthu bak sawi tur a hre lo. Lawmawma'n ṭawngkam a thiam lo a, a kut erawhin ring chhungah a tih tur a hre thung.

Welterweight-ah Republic Veng tlangval Zochhuanawma Fanai-in amah aia MIZBA-in National Boxing C'ship-a an tirh Muthi tlangval Malsawmkima chu split decision-in a hneh. NE Olympic hnuhnung bera gold medalist Zochhuana'n a tawnhriat neihna a pholang a, ring chhungah a chungnung zawk.

Chutihrualin result puan sual vangin Malsawmkima'n chak zawkah a inngai hman a, Republic Veng tlangval a meng phawk hle. Zochhuana, "Mak ka ti a, ka awih lo," tiin Repblic Veng Branch YMA-in an hmuahnaah result an puan sual laia a rilru put hmang a sawi.

Muthi tlangval Malsawmkima hian hnehna chang ta lo mah se theihna sang tak a nei tih a pholang a, pianpui chakna a neih bawk avangin boxing-ah hmabak êng tak a nei a ni.

F. Lalthanliana Jr chuan Tuirial tlangval Johan Vanlalrema hnehin light heavyweight-ah a champion. Lunglei Electric Veng tlangval hian a hnehna chan hi a pa mual liam tawh F. Lalthanliana tan a hlan a ni.

Light heavyweight champion F. Lalthanliana Jr chuan, "A hmasa berin min chhandamtu Isua Krista hnenah lawmthu ka sawi a, Sete Boxing Academy (SBA) chungah lawmthu ka sawi. Coach Sete leh coach Andrew-te inchungah ka lawm e," tiin a sawi.

F. Lalthanliana Jr hian boxing a khelhna a la rei lo a, Sete Boxing Academy-ah (SBA) inzirin MFN light heavyweight title hlu tak a hlawh chhuak.

Hmeichhe category hi pathumah ṭhen a ni a, ITI Veng boxer Lalrinchhani Pautu chu best boxer-a thlan a ni. Rinchhani hian flyweight final-ah Lunglei Rahsi Veng nula Lalremsiami chu unanimous decision hmangin a hneh.

ITI Veng nula Lalrinchhani hi Mizoram Fight Night-a a champion hma hian Junior National Boxing C'ship-ah ṭum hnih a tel tawh a, NE Olympic hnuhnung berah khan silver medalist a ni bawk.

Rinchhani chuan inhnek zawhah Pathian hnenah lawm thu a sawi a; Coach, second man leh amah ṭawiawmtute chungah lawmthu a sawi bawk.

Ruthi Lalhmingṭhai chuan ITI Vengin champion belt pahnih an hawn a remti lo a, featherweight-ah Ruthi hian TC Lalremruati chu split decision hmanga hnehin Reiek lamah champion belt a hawn ta zawk.

Ruthi hi SAI Mission Vengthlangah a awm mek. Junior national-ah bronze pahnih a la tawh a, Youth national-ah bronze la tawh bawkin NE Sports week-ah silver a la tawh a, tun ṭumah hian amah aia tawnhriat ngah zawk a hneh a ni.

Reiek nula chuan, "Kan khaw mipuiten ka phu loin thilpek min pe a, ka lawm hle. Ka ṭhianten min ṭawiawm ṭha a, ka lawm hle," tiin inhnek zawhah a sawi.

Lightweight-ah Lalbuatsaihi leh Rudy Lalhmingmuani te an intum tawk a, tawnhriat nei ṭha zawk Bethlehem Vengthlang boxer BS-i a vannei zawkah a ṭang.

BS-i hi boxing thiam vangin SSB-ah a thawk mek. India aiawhin Nation Cup 2015 Serbia-ah a tel a, kum 2019 khan China-a World Police Games-ah gold medal a la a, kum 2021 khan Dubai-ah Elite Asian Boxing C'ship silver medal a la bawk.

Lightweight champion BS-i chuan, "Pathianin damna leh hriselna min pe a, Amah chu fakin awm rawh se. Hetiang dinhmun thleng thei tur leh Asia hiala medal la tura min training-tu Sete-a chungah ka lawm hle," tiin a sawi.