Bangkok-ah Mizo boxer pathum

WBA Asia title chuh turin Mizo boxer pahnih Vanlalawmpuia leh F. Zoramchhana te an inlan dawn. Thailand khawpui Bangkok-a inelna neih turah hian LPS Pro Fight flyweight champion Laldinsanga pawh a feh chhuak dawn a ni.

February 4, Ningani hian Spaceplus, Thailand-ah The Fighter world boxing buatsaih a ni dawn a, Thai fighter Phoobadin Yoohanngoh-a kawl mek WBA Asia super lightweight title chuhsak tumin kum 25 mi Awpa a inlan ang.

'The Animal' tia hming lem vuahsak Awpa hian 2022 LPS Pro Fight lightweight title a hnek chhuah hnua a khelh leh hmasak ber tur a ni a, professional huangah ṭum ruk chak tawhin vawi khat a tlawm a, ṭum khat a khingpui a inhnehtawkpui a ni.

Thai rawlthar, kum 19 mi Phoobadin chuan professional boxing vawi 15 khel tawhin a chak vek, nikum December 3 kha a inhnek hnuhnun ber niin Filipino fighter Rimar Metuda a hneh a, Mizo tlangval lakah WBA Asia title a humhim theih ngei a inring.

WBA Asia bantamweight champion lai Yuttapong Tongdee-a hmaah Zotea'n fiahna a hmachhawn ve thung ang. Kum 29 mi Tongdee hian nikum October 1 khan Filipino boxer Herlan Gomez a knockout a, ṭum kua a inhnek tawhah chak vekin knockout-in vawi nga a chak.

A inhnek hnuhnun berah Zotea a tlawm a, nikum September 30 khan LPS Pro Fight bantamweight final-ah Tuipui tlangval Lalrinngheta a hneh lo a, professional huanga ṭum hnih a tlawmna niin vawi li a chak tawh a, hmabak huphurhawm tak su tlang turin Bangkok a pan dawn a ni.

Nikum July 2 khan Bangkok-ah a vawi khat nan Awpa leh Zotea an fehchhuak a; The Fighter, world boxing show-ah Thai boxer ve ve Aekkawee Kaewmanee leh Yutthana Kaensa hnehin WBA Asia title chuh thei turin hun ṭha an neih theih phah a ni.

Mizo rawlthar boxer zinga beiseiawm bera ngaih Dinsanga tan hun ṭha a inher chhuak ve nghal a; sang tak thlen tuma hma lam hun a thlir mek laiin a vawi khat nan India ram pawnah a inhnek thei dawn a, Awpa leh Zotea ruala Thai khawpuia a inlan theih nan 3:16 Plan Solution chuan senso an tumsak.

Kum 19 mi Dinsanga hian amah aia kum hniha naupang Jinnawat Samnual a bitum dawn a, Thai rawlthar hi vawi hnih a inhnek tawhah vawi khat chakin ṭum khat a tlawm.

Kum 2022 LPS Pro Fight flyweight-ah chiang takin Lunglei rawlthar a champion ve thung a, a bitum zawng zawng knockout-in a hneh vek. Hemi rual hian professional a luhchilh tel nghal a, vawi hnih a chak zawn mek a ni.