Spanish Super Cup-ah El Clasico kan hmu dawn

Supercopa de España semifinal-ah Barcelona chuan penalty hmangin Real Betis an hneh a, final-a Real Madrid hmachhawn turin an inpettling - El Clasico kan hmu dawn.

Saudi Arabia-a semifinal inkhelah Barca leh Real Betis hi hun pangngaiah 2-2 in an inhnehtawk a, Robert Lewandowski leh Ansu Fati ten Barca tan vawi hnih ngawt hmahruaina goal khung mah se Nabil Fekir leh Loren Moron hmangin Betis-in an chhanglet a, penalty pet a ngaih phah.

Barcelona tana pettuten an pet goal vek laiin, Betis tan William Carvalho leh Juanmi ten an khung lo a, 4-2 in Barca an chak zui - semifinal hmasa zawkah penalty hmang thoin Real Madrid an lo chak tawh a, Valencia chu 4-3 in an hneh.

Pathianni zan dar 12:30-ah Spanish Super Cup final hi khelh a ni dawn a, kartawp La Liga-ah Super Cup khel club palite hi an inlan ve dawn lo - he thu buatsaih a nih lai hian India rama Spanish Super Cup live-na tur hriat theih a la ni lo.

Hei le Lewy

Barcelona tan Pedri chuan goal hmahruai a khungah inngai mah se, offside vangin pawmsak a ni lo a, Betis lamin Fekir leh Luiz Henrique hmangin Catalan club hi harsatna an siam ve reng bawk.

Mahse, goal khung hmasa zawk erawh Barca an ni a, hrem vanga La Liga match hnuhnung bera Atletico Madrid hmachhawn lotu Robert Lewandowski chuan goal khung châkin a tuihal reng tih a pholang a, minute 40-naah a khung.

Lewy hian Dembele siamsak chu shot mah se dansak a ni a, a per lehlam a shot erawh Betis keeper Claudio Bravo tan dan hman a ni bik lo - Polish striker hian Barca a pan hnuah match 21 khela goal 19 khungin, assist vawi li a nei tawh.

Barca hlim chhung erawh a rei lo - chakpui an inbeisei goal hi Fekir chuan a thaibosak a, minute 77-naah Henrique-a hnathawh ṭhat zarzoin si phurh sutna a khung.

A hmuhnawm

Minute 90 chhungin goal dang a lut lo a, extra time khelh zui a ni. Barca bawkin goal an khung hmasa a, extra time ṭan aṭanga minute thumna lekah Fati chuan fan-te tan beiseina a siamsak.

Mahse, Betis an beidawng duh bik lo - minute 101-naah Moron chuan fing zeta Barca keeper Marc-Andre ter Stegen bumin, si phurh a sut leh a, minute 118-naah Betis midfielder Andres Guardado chu a yellow card pahnihna avangin hnawhchhuah ni mah se, Barca tan chhawr hman a ni lo.

Goal dang a luh zui loh avangin penalty hmanga chak zawk zawn a ni a, Ter Stegen-a channa a ni - German keeper hian Juanmi leh Carvalho pet a dansak a, Barca tana pettu Lewy, Franck Kessie, Fati leh Pedri ten an chhuih lut vek thung.

Copa del Rey champion Betis leh finalist Valencia te Spanish Super Cup semifinal-ah an tla a, La Liga champion Real leh pahnihna Barca ten nomawi an inchuh dawn.