Chelsea defender thar Benoit Badiashile

Premier League club Chelsea ṭantuten thlasik transfer-ah lawmna tur an nei a, AS Monaco defender Benoit Badiashile chu Ningani zan khan an lalut.

Kum 21 mi defender man atan hian Chelsea chuan pound maktaduai 35 bawr vel an seng nia tarlan a ni a, Ligue 1-a season nga zet hun hmang tawh defender ṭhangduang hian kum sarih leh a chanve chhung atan contract a ziak.

Badiashile chuan, "Chelsea ka pan thei hi ka lawm takzet a, he club tana ka khel thei tur hi ka lawm hle a ni. Fan-te nen inhmuh a, khawvela league ṭha bera khelh ka châk tawh hle," a ti.

France tana vawi hnih inlan tawh Badiashile hi Monaco aṭanga inzir chhuak niin, tun season-a match 16 a khelhah goal hnih a khung tawh a, Ligue 1 club tan hian match 135 zet a khel hman - goal ruk khungin assist vawi thum a nei.

November 2018 khan Thierry Henry-a enkawlna hnuaiah Monaco tana a match hmasa ber a khel a, tunah chuan Chelsea tan khelin Premier League-ah kan hmu dawn ta.

Monaco sporting director Paul Mitchell chuan, "Tun hnai kum hnih leh a chanve chhunga a hmasawnzia hmuh hian, amah leh a puitu staff-ten level sanga harsatna an tawh lohzia pholanna a ni.

"Europe club lian ber pawl a zawm hi kan academy leh first team hnathawh rah a ni a, Monaco hi player naupang zawkte chher hriam tura kan ṭhat tawkzia pholanna a ni bawk," a ti.

Blues chairman Todd Boehly chuan, "Chelsea-ah Benoit kan lo lawm a, player naupang ṭha tak, hming chher tawh tak a ni a, a kum zat ngaihtuaha a tawnhriat hi a ṭha tawk hle bawk.

"Kum lo kal zel turah kan team tan hna ṭha tak a thawh kan beisei a ni," a ti - Chelsea hian hliam vangin defender Wesley Fofana, Reece James leh Ben Chilwell an chhawr thei lo mek a, Blues tan chuan centre back ṭhangduang lakluh hi a lawmawm khawp ang.