Copa del Rey: Barcelona an chak hram

Barcelona-in Copa del Rey round of 32-a hnehna chang turin vanneihna an mamawh a, extra time-a Ansu Fati goal khung hmangin third division club Intercity Sant Joan d'Alacant chu 4-3 in an hneh hram.

Intercity tan Oriol Soldevila chuan rin loh takin hattrick a rawn siam a, a chanchinin ngaihven zui a hlawh hle - mahse, Barca tan Ronald Araujo, Ousmane Dembele, Raphinha leh Fati ten goal khat ṭheuh an khung a, Catalan club an chak.

La Liga club ngaihven hlawh inlan zingah Atletico Madrid chuan 2-0 in Real Oviedo an hneh a, Marcos Lllorente leh Pablo Barrios ten goal khat ve ve an khung - second division club lamin a chhanletna tur an nei lo.

Sevilla chuan 5-0 in third division club Linares Deportivo an sawp bawk a, Youssef En-Nesyri chuan hattrick siamin Luciano Squadrone leh Erik Lamela ten goal khat ve ve an khung bawk.

Barca an vannei

Catalan club tan Ronald Araujo chuan minute lina lekah goal hmahruai a khung a, engzat tak khung ang maw, tih chu rilrua zawhna awm hman a ni - mahse, mualneitu Intercity lamin ngaihdan dang an nei.

Soldevila chuan minute 59-naah si phurh sutna goal a rawn khung a, Barca-in Dembele leh Raphinha hmangin vawi hnih ngawt hma hruai nawn mah se Soldevila hian a sut ve ve bawk!

Hun pangngaiah chak zawk awm loin 3-3 a ni a, extra time khelh a ngai hial - a tawpah top division club danglamna a lang a, Ansu Fati chuan minute 103-naah chakna goal a khung.

Barca goal hmahruai khungtu Araujo chuan, "Hei hi cup inelna danglamna chu a ni a, kan tan chuan inzirna ṭha tak a ni," tiin a sawi a, knockout tournament-ah chuan beisei loh result a thlen fo theih thu a sawi.

Tu nge Soldevila?

February 2021 khan Kylian Mbappe chuan Barcelona lakah hattrick a siam a, French striker hi football khawvelah a chanchin inzawh nawn a ngai lo - Paris Saint-Germain FC striker hnua Barca laka hattrick siam leh hmasa ber erawh hriat ngai loh Soldevila a ni.

Kum 21 mi Soldevila hi Barcelona youth team tan pawha lo khel tawh a ni a, season hnih chu English club Birmingham City reserve team tan a khel - June 2022 khan Intercity hi a zawm.

Spanish third division club tana a season hmasa berah a naupan lai aṭang tawha a ṭan em em Barca a hmachhawn a, hattrick a siam zui. Soldevila chuan, "Ka hriat theih aṭang tawhin Barca ṭantu ka ni.

"Ka goal hmasa ber ka khung khan ka lawm em em a, goal hnihna leh thumna ka khung kha chuan ka awih tawh lo zawk," a ti a, "Barca third keeper Arnau Tenas-a kawr kha ka dil ang - football-a ka ṭhian ṭha ber a ni a, a kawr ngei a ni ka duh ni," a ti bawk - a ṭhianpa a dah hlu thiam hle.