Point 55 neitu Giannis

Giannis Antetokounmpo chuan NBA regular season inkhelah point 55 ngawt a nei a, a club Milwaukee Bucks chu Washington Wizards lakah 123-113 in hnehna a chanpui.

Kum 28 mi Antetokounmpo tan basketball inelna sang berah, match khata point a hmuh hnem ber ṭum a ni hial. Point 55 bakah hian rebound vawi 10 lain assist vawi sarih a nei bawk, hnehna an chan theih nan a thawh hlawk rem rem hle.

Greek tlangval Anteto-kounmpo chuan, "Tun ang hun tawng tur hian ka thawkrim, ka inkhelh dan hi mi tam tak hmuhnawm tih chi a ni lo mai thei, mahse kei chuan hma ka sawn theih nan hian theih tawp ka chhuah reng," a ti.

NBA Most Valuable Player vawi hnih ni tawh Antetokounmpo bakah hian, point 17 a neih bakah rebound vawi 13 latu Bobby Portis chu Bucks chak theihna chhan langsar a ni bawk.

Inkhel dangah Sacramento Kings chuan Utah Jazz 117-115 in an hneh a, Oklahoma City Thunder pawhin season hmang ṭha tak Boston Celtics 150-117 in an hneh bawk a ni.