Napoli chak loh zanah Milan chak
Kumin atan Serie A chu Nilaini zan aṭang khan khelh ṭan a ni leh ta a, champion lai AC Milan chuan Salernitana an luhchhuah laiin, season duhawm hmanga hmahruai mektu Napoli erawh tun season bika a vawi khat nan an tlawm.
Luciano Spalletti enkawl Napoli hi an kaltluang a, an legend Diego Maradona thih hnuah an champion dawn ni pawhin a lang hman, mahse awlsam tak erawh a ni dawn lo, team ṭha Inter Milan lakah 1-0 in an chak lo.
A zawna Serie A match 11 chak tawh Napoli hian hun tawp dawnah Giacomo Raspadori hmangin goal an khung theuh hle, mahse Inter keeper Andre Onana a paltlang zo lo. Inter tan Edin Dzeko chuan Federico Dimarco siamsak chu goal awmchhun atan a khung thung.
Chak lo mah se Napoli hi hmahruaitu erawh an la ni tho, match 16 aṭangin point 41 a nei tawh a, an hnuai chiaha awm AC Milan aiin point ngain an la sang zawk, match khelh zat aṭanga teh chuan season chanve an la hmang tling lo deuh tih erawh hriat a ngai.
Milan inlar
Inkhel dangah Milan chuan kawng dik an zawh. Portugal international Rafael Leao-a'n Mexico goalkeeper Guillermo Ochoa a vir khum hnuah goal hmahruai a khung a, a siamsaktu Sandro Tonali chuan a khung belh bawk.
Goal a khung baka assist neitu Tonali chuan, "Duhthusama ṭhain kan khel ṭep a ni ber mai, goal dang khung belh thei ni ila chuan kan khelh danah sawisel tur a awm lo ang. Kan nomawi humhim turin kan bei zel dawn a, beiseina tlemte tal a awm chhung chu kan bei ang," a ti.
Milan manager Stefano Pioli chuan, "World Cup bakah Krismas chawlh chhung a rei a, match pangngai khelh theih loh kara friendly match kan khelh khan nasa takin min pui niah ka ngai, hmasawnna tur erawh kan la ngah," tiin a sawi thung.
Juve an chak
Juventus pawh an kang sang ve zel a, chak tur erawhin hun tawp dawna Arkadiusz Milik goal an mamawh thung. Cremonese mualah Old Lady hian goal khung an harsat, minute 90+1-ah Milik hian chakna goal a khung hram.
Chak hram tia sawi theih ni mah se, tun hnaiah Juve hi an kaltluang ta viau, inelna hrang hranga an match hnuhnung pasarihah goal chhuah loin an chak, season bul ṭan fuh lo viau mah se tunah chuan point 34 neiin table-ah pathumna dinhmun an luah leh der tawh.
Juve manager Massimiliano Allegri chuan, "Cremonese hmachhawn kha thil awlsam a ni dawn lo tih kan hre lawk, kan rin leh beisei ang ngeiin a harsa bawk. A tawpah erawh ka naute khan an phu ang ngeiin point thum an hmu," tiin chak phu zawk an nih thu a sawi.