Vanglaini Biangbiakna : Goal aiin chak ka ngai pawimawh - LZ Chhangte
Mizo mai ni lo, Indian player zinga tun season-a 'hot' ber thlang dawn ila, Lallianzuala Chhangte lo chu thlan tur an awm chuang lo - Lunglei tlangval hian ISL match 12 a khelhah goal sarih a khung tawh a, assist vawi hnih a nei.
ISL khelh mekah top scorer ni lai a ni a, Mizo forward aia goal khung hnem zawk an awm lo - Lianzuala hian ISL hrim hrimah match 109 khel tawhin goal 27 a khung tawh a, assist vawi riat a nei bawk.
LZ-a hian match 76-a goal 24 khungtu Jeje Lalpekhlua khumin, ISL-a Mizo player zinga goal khung hnem ber a ni a, Indian player-ah chuan match 125-a goal 52 khungtu Sunil Chhetri chiah a tluk lo.
Mahse, Lianzuala'n goal aia result a ngaih pawimawh thu Vanglaini a hrilh a, a tlan chak leh chet ran em avanga 'Mizo Flash' hming lem an pek chuan, "Goal khung ai chuan ka team ka chakpui em, tih hi ka dah hmasa zawk," tiin Vanglaini a hrilh.
Mumbai an vul
Tun season ISL-ah Mumbai hian match 12 khel tawhin vawi kua an chak a, vawi thum draw an nei - tlawm an la nei miah lo a, league round hmahruaitu ni chunga semifinal lut turin an dinhmun a ṭha hle.
Durand Cup top scorer (7 goals) Lianzuala chuan, "Pathian zarah kan la ti ṭha rih viau a, kan squad enin mak ka ti hran lo - mipui min beisei dan sa pawh niin ka hria," a ti - Mumbai-ah hian Lalengmawia Ralte (Apuia) chuan hmun pawimawh a chang bawk.
Ke rek hliam vanga an match hnuhnung bera inlan lo Apuia hian tun ISL-ah match 10 khelin goal thum a khung tawh a, hero of the match-ah vawi khat thlan tawh niin December khan Emerging player of the month atan thlan a ni.
Lianzuala hi hero of the match-ah vawi hnih thlan a ni tawh a, ISL-a a season hmasa ber, kum 2016-a minute 21 chiah kheltu forward hian tun season-a match an khelh zawng zawngah a khel kim vek.
Beidawnna hnehtu
Lianzuala tan tun dinhmun thleng tur hian kawng a awlsam bik vek lo - Delhi Dynamos-ah season hnih ṭha taka a khelh hnuin kum 2019 khan Chennaiyin a zawm a, hmun pawimawh a chang nghal.
South Indian club tan a season hmasa pahnihah match 41 khelin goal 11 a khung a, mahse, 2021-22 season-ah match 12 chiah inlanin, goal khat chiah a khung a, a inlanah pawh bench aṭanga luhtir a ni fo.
Lianzuala hi season ṭantir lamah Chennaiyin hian contract thar, mawm tak an chhawpsak a, South Indian club-a chamtir reng an duh. LZ-a'n contract thar a ziak hman ṭep a, mahse, bench-a a duh aia tam hun a hman hnuin a ngaihdan a thlak.
Team ṭha tak Mumbai City lamah huaisen takin Lianzuala a pem lut a, English coach Des Buckingham-a'n a chunga rinna nghat chungin duat takin a lo enkawl a, Lianzuala a vul leh ta.
Thawhrim rah
Lianzuala chuan, "Bench-a hun ka hman khan, hmasawn zel tur chuan inkhelh tam ka mamawh tih ka hria a, Mumbai pan ka thlang. Ni tin deuhthaw training zawhah a hranpain ka ti leh ṭhin a, chu chuan nasa takin tun hunah hian min pui niin ka hria," tiin Vanglaini a hrilh.
ISL-ah Indian player-in top scorer dinhmun an la luah ngai lo a, ni thei dinhmunah Lianzuala a ding mek. I League club DSK Shivajians aṭanga a professional career ṭantu Lianzuala chuan, "Foreigner ta chauh a ni bik lo a, Indian pawh top scorer kan ni ve thei.
"Chutihrual chuan, tun hi top scorer sawi hun a la ni lo a, semifinal luh tum phawt ila, chumi hnuah chuan a la sawi theih ang chu - theihtawp chhuahin khung belh zel erawh ka tum ang," a ti.
He thu buatsaih a nih lai hian Chennaiyin forward Abdenasser El Khayati leh East Bengal striker Cleiton Silva te chuan ISL-ah goal sarih an khung ve tawh bawk.
Beiseina
Lianzuala chuan, "Pathian zarah sang tak kan thlen ka beisei a, nomawi hawnte pawh a châkawm ve tawh alawm," a ti - ISL nomawi a la chawi ngai lo. Lianzuala chuan, "Pathian awmpuina, chhungte leh ṭhiante ṭawngṭaipuina, teammate te thlawpna zarah ka la che ṭha rih viau chuan ka hria.
"Hmasawnna tur erawh tam tak a la awm a, hmasawn zel ka tum ang," a ti bawk. Lianzuala chuan, "Keimah chauh ni lo, Mizo player zawng zawngte kan chet ṭhat a, hliam lakah te kan him theih nan, duhsak kan hlawh ve theih nan, min ṭawngṭaipui zel turin Mizo mipui kan sawm a ni.
"Infiamna khawvel hi Mizotena Pathian rawng kan bawl theihna kawng pawimawh tak niin ka hria a, ṭawngkain Pathian thu sawi thei lo mah ila, kan chezia leh chet dan an en reng a ni," a ti a, ṭawngṭaipui turin Mizo mipui a sawm.
Mumbai City hian Pathianni zan dar 7:30-ah Kerala Blasters nen league match an khel leh dawn chauh - zanin dar 7:30-ah NorthEast United leh Bengaluru an inkhel dawn a, nizan FC Goa leh Hyderabad inkhel result kan hre hman lo.