Man United-in Butland an la dawn

Newcastle United-in thlasik bazarah Manchester United-a loan hmanga an kaltir Martin Dubravka an la let a, Erik ten Hag-a hoten David de Gea thachhang dawl turin Jack Butland an la thung ang.

Nimin khan Butland hian medical test a nei niin sawi a ni a, he thu i chhiar meuh chuan Man United player a ni thei tawh hial ang. English goalkeeper Butland hian Palace-ah hian thla ruk chauh contract a nei tawh a, chutihrualin club lamin season khat atan an la pawtsei thei thung.

Club pahnih inremnaah hian United tan Butland lei theihna a awm lo. Butland hi kum 29 mi a ni a, England tan match kua khel tawh mah se beisei angin a ṭha chhuak lo. Crystal Palace-ah Butland hian khelhna hmun a chang pha lo a, a chungah Vicente Guaita leh Sam Johnstone te an awm.

Manchester United-in goalkeeper pahnih De Gea leh Tom Heaton te an nei sa, Butland hi pathumna tur a ni ang. Ten Hag-a hote tan thlasik bazara an player lei hmasa ber a ni dawn a, chutihrualin United-in tun transfer bazara an hmachhawp lian ber erawh striker ṭha lak a la ni reng.