FA Cup - Zanin dar 1:30-ah Man United-in Everton an mikhual dawn

Khawvel football inelna upa ber FA Cup-ah Premier League leh Championship club-te third round aṭangin an inlan ṭan dawn a, zanin dar 1:30 hian Old Trafford-ah Manchester United-in Everton an hmachhawn ang. Third round-ah hian team 64 an awm a, team 20 hi round hmasa lam aṭanga inpettling chho niin Premier League club 20 leh Championship club 24 ten an belh bawk.

Man United-in FA Cup an champion hnuhnun ber chu kum 2016 kha a ni a, nomawi an chawi hnuhnun ber chu Jose Mourinho hnuaia Europa League (2017) an champion kha a ni. Portuguese manager chhuah hnuah Man United-in nomawi an la chawi lo a, Ole Gunnar Solskjaer-a'n kum thum chhungin nomawi a chawipui thei lo a, Erik Ten Hag hnuaiah nomawi an beisei leh mek.

United phur lai

FIFA World Cup khelh laiin friendly match vawi hnih an khel a, Spanish club Cadiz (4-2) leh Real Betis (1-0) lakah an tlawm. Amaherawhchu, inelna tak tak ṭan hnuah Erik ten Hag-a hote an che ṭha a, League Cup last 16-a Burnley (2-0) an hneh hnuin Premier League-ah Nottingham Forest (3-0), Wolves (1-0) leh Bournemouth (3-0) te an hneh leh tawh.

Match li an khelhah hian an clean sheet vek a, goal riat an khung bawk. Chutihrualin United-in insiamṭhatna tur an ngah - match hnuhnung bera Cherries 3-0 a an hneh ṭum hian an khingpuite hian goal khung theihna chance an insiam hnem hle.

United keeper David de Gea chuan, "Clean sheet avangin ka lawm. Mahse, Ten Hag erawh kan khingpuiten chance an ngah avangin a thinrim," tiin tlarhnung tihphui lehzual an mamawh thu a sawi.

Ten Hag-a hote tana chanchin lawmawm erawh Cherries an hneh ṭumin World Cup-a Argentina champion puitu defender Lisandro Martinez leh Portugal right back Diogo Dalot te bench aṭangin an lut. Tlarhnungah duh thlan tur player an awm.

Midfield-ah Donny van de Beek an chhawr thei dawn lo a, chutihrualin tlarhma lam pawh buaina tur awmin a lang lo. Jadon Sancho leh Antony ten training an zawm leh tawh a, match fitness neih nan minute an neih ngei a rinawm. FA Cup hi third round chauh ni mah se Premier League club Everton an hmachhawn dawn avangin fimkhur erawh a ṭul ang.

Dinhmun derthawng Lampard

Everton hian kum hlui thlah zanah Premier League champion lai Manchester City an chelh thei a, hei lo hi chu chanchin ṭha sawi tur a nei meuh lo. Toffees hi Premier League-ah October thla hnuah vawi hnih an chak a, vawi sarih ngawt chak loin vawi hnih an inhnehtawk.

Frank Lampard hote hian league match hnuhnung 11-a point 33 hmuh theih aṭangin point riat chauh an hmu a, table-ah pawh 18-naah awmin tla thei dinhmunah an ding. Hemi a nih avang hian Lampard hi an ban ngei a rinawm a, khawthlang journalist-te chuan a thlakna tur an inrinsiak tawh.

English manager Lampard hian a hna hi chelh chhunzawm a duh a nih chuan Man United hneh hi a pawimawh dawn. Toffees hian hliam vangin Andros Townsend leh James Garner te an chhawr thei dawn lo a, Nathan Patterson pawh a dinhmun a chiang lo. Player dang erawh an dam ṭha a, Man City chelh theitu Everton hian Man United hneh an tum ang.