Van Dijk a inhliam na

Liverpool defender Virgil van Dijk chu rin lawk dan aiin a malpui hliam chu a na a, a dinhmun dik tak hre turin specialist an hmu dawn. Netherlands defender Van Dijk hi Thawhṭanni zana Brentford a hneh loh ṭumin hliam vangin halftime-ah lakchhuah a ni.

Inkhelh banah manager Jurgen Klopp chuan, "A inhliam nat zual kan hlauh vang chauhin kan la chhuak. Physio pawh ka thutlukna vangin an lawm a, hliam tia chhiar tur a ni lo," tiin a sawi.

Amaherawhchu, Van Dijk hi rin lawk dan aiin a hliam na a, a chawlh hun chhung la hriat rih lo mah se a chawlh phawt a ngai dawn. Liverpool hian hliam vangin Luis Diaz, Diogo Jota, Arthur Melo, James Milner leh Roberto Firmino te an chhawr thei lo a, Van Dijk inhliam hian an buaina a belhchhah ang.

Klopp hian defence laiah Joel Matip, Ibrahima Konate, Joe Gomez leh Nat Phillips te a la kawl a, duh thlan tur player chu nei mah se player ṭha bik a nei lo. Liverpool hi Premier League-ah paruknaah an awm mek a, season thara Champions League khelh phak pawh a harsa dawn.