Chhani'n gold medal pahnih la

Indian Weightlifting Federation (IWLF) hnuaia inelna - National Youth, Junior leh Senior Weightlifting Championship neih laiah, Mizoram tan Lalchhanhimi chuan Women Senior Weightlifting Championship (76kg) leh National Inter State Women (76kg) huangah gold medal a la.

Inelna hi Nagercoil, Tamil Nadu-ah December 29 aṭang khan neih niin, Chhani hian gold medal la tur hian - snatch 90kg, clean & jerk 120kg, total-ah 210kg a chawi a, a tiatpui zingah a chawi rit thei ber.

National Games leh Olympic-ah 71kg category hi a awm tawh lo, hei vang hian Chhani hian tun hmaa a khelhna category a thlak a ngai a, a khelhna ti rit hret mah se NCEO SAI, Bengalore lama training a neih ṭhat chu a takah a chhawr.

Inelna neih laiah hian Mizoram tan Lalruatfela chuan 81kg (youth) huangah gold medal a chawi chhuak tawh bawk. Lalruatfela hian snatch 120kg, clean & jerk 150kg, total-ah 270kg chawiin a chungnung ber. Ruatfela hi Mizoram Weightlifting Academy, Ramhlun Sports Complex-a inzir lai a ni.

Championship hi January 7, Inrinni thleng neih tur a ni a, Mizoram aiawh hian infiammi 11 leh official pakhat an feh chhuak a ni. Lalzuidika pawhin Senior Men Inter State-a 61kg huangah bronze medal a lo la tawh bawk.