Djokovic tan lawmna leh lungngaihna!

Novak Djokovic-a'n harsatna nei loin Australia ramah tennis a khel thei tawh a, tournament lian Australian Open inbuatsaihna zinga mi Adelaide International a khel mek, harsa lutuk loin quarterfinal a inhlangkai.

Australia rama a inkhelh theih tawh lai hian United States lamah erawh a la zin thei dawn lo niin a lang. US thuneitu lam chuan an rama zin tur tan Covid 19 laka invenna lak a ngai tih an sawi thar.

Grand Slam dawta inelna ngaihhlut zinga mi Indian Wells leh Miami Open te chu March thlaah khelh a ni dawn, tun dinhmna a lan dan chuan heng tournament pahnihah hian Djokovic a inlan thei dawn lo tihna a ni.

Adelaide International last 16-ah, seeded pakhatna Djokovic hian Quentin Halys chu 7-6 (7/3), 7-6 (7/5) in a hneh a, quarterfinal-ah chuan Canadian tlangval Denis Shapovalov a hmachhawn chhunzawm leh ang.

Kum 35 mi Djokovic chuan, "Ka khingpui khan a khel ṭha khawp mai, a khelh danah chuan world number 10 huanga tel ni awm tak a ni," tiin a khingpui a fak a, tun hnaia ama khelh danah a lawm tawk tih a sawi bawk.

Australian Open 2023 chu January 16 aṭangin Melbourne Park-ah khelh a ni dawn, tennis season khat chhunga major tournament hmasa berah hian nikum khan Novak hi a inlan thei lo, kuminah erawh a vawi 10 nan champion a tum dawn.

Adelaide International inkhel dangah Daniil Medvedev pawh a chak. Russian tlangval hian quarterfinal lut turin Miomir Kecmanovic chu 6-0, 6-3 in a sawp a, ani pawh hi hard court-a inkhel thiam a nih avangin Australian Open-ah pawh player hlauhawm a ni chhunzawm ang.