Mizoram tan silver medal a chiang

National Boxing Championships khelh mekah Mizoramin silver medal pakhat chu an hawn dawn tih a chiang tawh - nimin khan Mizo boxer Zorammuana chuan semifinal-ah Jammu & Kashmir boxer ṭha Mohammed Aarif chu 5-0 in a hneh a, final a lut.

Hisar, Haryana-a khelh mek National Boxing Championships-ah hian Zorammuana hi Flyweight (48-51 kg) ah a inlan a, vawiinah hian Services Sports Control Board (SSCB) boxer Bishwatira Chongthan nen gold medal chuhin an inhnek ang.

Sports & Youth Ser­vices Department-a boxing coach Rozamliana chuan, "An pahnih hian final an luh rinna ka neih avangin an game ka en ve ve a, Zorammuana'n hnehna a chan ka beisei hle. Zorammuana hi SAI aṭanga Krismas chawlh an neih pawh a, an khua lama haw duh lo a, ngawrh taka training ka neihpui chhunzawm a ni a, a inpekna hian gold medal a phu a ni," tiin Vanglaini a hrilh.

Tuipui boxer Zoram­muana hmachhawn tur Bishwatira Chongthan hi Services boxer ni mah se, Manipur lam chhuak a ni a, vawiinah final hi an khel nghal dawn - he thu buatsaih a nih lai hian an intawn hun tur dar zat tihchian theih a la ni lo.