Palace lakah Tottenham Hotspur an inhrithla!

Aston Villa laka an tlawm hnuin Tottenham Hotspur an insiamṭha lehnghal a, London derby-ah Crystal Palace chu 4-0 ngawtin an sawp - Spurs tan Champions League beiseina a la nung ve zel e.

Premier League-a game 300 a khelh tlin zanah Spurs tan Harry Kane chuan goal hnih a khung a, Matt Doherty leh Son Heung-min ten goal khat ve ve an khung bawk. Palace lamin a chhanletna tur an nei ve lo.

Ningani zan Premier League inkhel dangah Nottingham Forest chuan Taiwo Awoniyi goal hmangin Southampton chu 1-0 in an hneh a, Aston Villa leh Wolverhampton Wanderers te chu 1-1 in an inhnehtawk thung - Wolves tan Daniel Podence chuan goal hmahruai khung mah se Villa-in Danny Ings hmangin an chhanglet a, an in draw.

Leeds United leh West Ham pawh 2-2 in an inhnehtawk. Leeds tana Wilfried Gnonto goal hmahruai khung chu Hammers-in Lucas Paqueta leh Gianluca Scamacca hmangin an chhanglet a, chak an inbeisei hnuah Leeds tan Rodrigo chuan khung ve lehin, 2-2 in inkhel a tawp.

Spurs an tho

World Cup hnua an league match hmasa berah Spurs hian Brentford chu khualmualah 2-2 in an inhnehtawkpui a, match hnihnaah an insiamṭha dawn emaw tih laiin Aston Villa chu 2-0 in an ngam lo zui.

Spurs ṭantute an hnual hman viau a, Palace lakah pawh first half chhunga goal a luh loh avangin an hlauthawng hman - tun hnai an result thlirin a awm lo hran lo a, fan-te dem theih an ni lo.

Mahse, mangan laia Spurs chhanchhuak ṭhintu pakhat a awm a, a hming chu Harry Kane a ni. English striker hian second half ṭan aṭanga minute thumnaah Ivan Perisic-a siamsak chu goal-ah a tauh lut.

Minute nga a liam a, Kane-a'n a la duhtawk lo - Bryan Gil-a siamsak chu harsatna nei loin goal-ah a chantir a, thawk­­lehkhatan Spurs ṭantute mangan­na leh hlauhthawnna zawng zawng chu vai kianin a awm.

Hei le Son!

Spurs-in Harry Kane hmanga goal hnih an khung hnuah hawikir zai an rel tawh lo a, minute 68-naah Kane-a ball pek dawngtu Son chuan Matt Doherty tan a siamsak ve leh a, Irish right back hian an goal thumna turin a khung.

Minute 72-na a ni a, Son Heung-min-a hun a ni - ram leh club tana match 12 zet goal khung lo zawn tawh forward hian a thiam a la theihnghilh lo tih pholangin, an goal lina a khung a, Spurs an chak chiang.

Kum 30 mi Son hian season hmasa khan league match 35-ah goal 23 khungin, top scorer a ni a, tun season-ah khel ṭha chungin goal hmaah a vannei tawk lo ṭhin a, Palace laka a goal kha tun season-a league-a a goal lina chiah a ni.

Palace-in chance nei lo an ni bik lo. Mahse, first half-a Jordan Ayew chance neih chu Hugo Lloris chuan ṭha zetin a dansak a, Joachim Andersen leh Michael Olise te pawh goal hmaah an vannei tawk lo.

A hming Kane

Kum 29 mi Kane-a'n professional football a khelh hnuah nomawi chawi la nei lo mah se striker ṭha a nihzia a pholan chhunzawm zel a, goal hnih a khung khan Spurs tan match 411-a goal 264 a khungna chiah a ni a, Spurs tana khung hnem ber Jimmy Greaves (266 goals) nih rual turin goal hnih chiah a mamawh ta.

Kane-a'n Premier League-a match 300 a khelhna chiah a ni a, goal 198 a khung ta bawk - Premier League match hmasa 300 aṭanga goal khung hnem ber record a ni a, goal 196 khungtu Alan Shearer a khum.

English striker Kane hi Premier League-a an match 100-na, 200-na leh 300-naa goal khung thei pahnihna a ni a, ani hma hian England legend Teddy Sheringham chuan a lo ti tawh bawk.

Kane hian tun season-ah league match 18 aṭangin goal 15 a khung leh der tawh a, season hmasaa goal 17 a khung chu a khum ngei dawn niin a lang - tun season inelna hrang hrangah match 25 khelin goal 16 a khung tawh.