Argentina champion - khawvel media-ten engtin nge an sawi?
Lionel Messi chuan world champion nomawi chawiin, rei tak a lo nghah tawh World Cup-ah Argentina a champion pui a, khawvelin ropui a ti a, media-te titi a luah a, thil dang a leng meuh lo.
"Final hmuhnawm bik" tia sawi tawk an awm a, tam tak chuan World Cup match awm tawh zawng zawnga ropui ber ang hialah an ngai - an demawm hran lo e.
Argentina khawpui, Buenos Aires-a chanchinbu lar tak Pagina 12-a ziaktu Jose Luis Lanao chuan, "Nipui hun thengthaw nuam tak ang mai a ni a, kan hnam puanzarte chu van dumpawlin mawi tak leh tlaizawng par inchawih mawi tak ang mai hi a ni," a ti.
Luis Lanao chuan ziah zawmin, "Football leh hlimnaa champion kan ni e," a ti a, an champion avanga an lawmna chu engmahin a khum zo hian a ring lo - kan dem lo che aw Lanao, Mizoram aṭang pawhin kan hlim ve em asin!
Khuanu ruat sa
Argentina chanchinbu darhzau ber Clarin-a ziaktu Juan Cruz chuan, "Football hi chu hling leh pangpar mawi tak nena duan a ni," a ti a, tam taka hlimna thlentu a nih laiin mittui titlatu a nih theih thu a tarlang tel.
Juan Cruz chuan FIFA-in kum 35 anga a tarlan Messi chu kum 34 angin a ziak bawk a, Cruz chuan, "Kum 34-ah Messi chu world champion a ni ta - a pian hma aṭang tawha a tana duan a ni," a ti - a hre ril angreng!
Clarin hian an headline-ah lian takin, "Messi, kan lawm e," tih an ziak a, Paris Saint-Germain forward hnenah lawmthu an sawi - an nghak rei em a, an demawm hran lo e. El Dia chuan, "In, club leh restaurant zawng zawng chu hlimnain a khat a ni," an ti.
Argentine chanchinbu pakhat El Tribuno chuan, "World Cup hlimawm," tiin a tarlang a, hei hian Argentina mipuite hlimna chu chiang takin a tarlang. Ni e, an tan chuan World Cup hlimawm a ni tlat!
Ṭap tawh su
World Cup final-ah meuh 2-0 a an hnufual kha chuan France an tlawm ngei a rinawm. Mahse, player-ten an rilru huaisenzia pholangin, si phurh an sut zo a, 3-3 a nih hnuah penalty hmangin an tlawm.
French chanchinbu Le Parisien chuan an player-te inpekna a hriatsak reng a, "Kan player-te kan chhuang takzet che u," tiin an ziak a, L'Equipe chuan, "In lu chungte chawi sang rawh u," tiin indawmkun lo turin an player-te an chah.
La Voix du Nord chuan, "Kan lawm tho tho e," tiin an ziak a, an team chuan World Cup nomawi chawipui ta chiah lo mah se an hnathawhah an lawm tawk tih an hrilh.
Ni e, France hi world champion ni ta lo mah se, World Cup 2018-ah champion nomawi an chawi a, a zawna final an lut ringawt pawh hi inchhuanna tham a tling - inchhuang tur an ni.
Messi & Magic
English chanchinbu lar The Daily Telegraph chuan, "Thilmak ti thei, ennawm chhawptu Messi," tiin Argentina captain an fak a, The Independent chuan, "Player ropui ber, final ropui ber, nomawi ropui ber," tiin an ziak tawi mawi thiam hle.
The Daily Mail chuan, "Macron-a chibai lungchhiatthlak tak chu," tiin France president Emmanuel Macron-a'n Kylian Mbappe a hnem lai thlalak an tarlang tel.
Daily Mail vek hian, "Mi danglam bik Messi-a'n a tawp a tawpah chuan World Cup nomawi a chawi ta - hlimna vawrtawp chu," tiin an ziak bawk a, Messi an fak.
The Guardian chuan, "Champions! Messi chawimawia a awmna chu," tiin an ziak a, Daily Mirror chuan,"Khawvela ropui ber," tiin an tarlang thung - Messi an dah sang hle.
A ṭha ber
Spanish chanchinbu lar Mundo Deportivo chuan, "Football chanchina player ṭha ber," tiin Messi chanchin an ziak a, El Pais chuan, "Final hriatreng tlak an khelh hnuah Messi-a Argentina chu an champion ta," tiin an ziak thung.
Marca chuan, "Messi leh Argentina te chuan inhnialna awm zawng zawng chu an titawp ta," tiin Messi chu footballer ropui berah an puang a, ani aia ṭha zawk awm theiah an ngai lo.
Brazilian chanchinbu Extra chuan, "Messi-a'n he nomawi hi a phu a, hei hi pawm mai a ngai a ni," an ti a, O Globo chuan, "Chuai thei lo Messi," an ti thung.
US chanchinbu lar The New York Times chuan, "Messi-a thilmak tih," tiin an ziak a, The Wall Street Journal chuan, "Messi-a'n World Cup-ah Argentina a champion pui ta," tiin an ziak thung.