MFA leh Zonet Cable TV Ṭang kawpin January-ah Futsal League ṭan dawn

Mizoram ṭhalaite nghah­hlelh Futsal League ṭan a ni dawn ta. Mizoram Football Association leh Zonet Cable TV Pvt Ltd-te chuan, Mizoram Football Association Futsal League bul tan turin nimin khan inremna an siam a, January 9, 2018-ah MFA Futsal League hi bul ṭan a ni ang.

Inremna chu
Futsal League kalpui tur hian MFA leh Zonet TV-te hian kum thum chhung thawkho turin thu an thlung a, he mi chhung hian Zonet TV chuan MFA Futsal League kalpuina turin kum tin Rs 5,10,000 an pe ṭhin dawn a ni.

Duan lawk ang chuan January 5, 2018 hian MFA Futsal Kickoff hi neih a ni ang a, January 9, 2018-ah Futsal league hi kalpui tan a ni ang. Futsal League inkhel zawng zawng hi Zonet Cable TV-in live-in an pe chhuak thin dawn a ni.

Zonet thu leh hla
Zonet Cable TV Managing Director RK Lianzuala chuan, "MFA nen hian hlawhtling takin Mizoram Premier League kan kalpui tawh a, sum leh paiah hlawkna nei lem lo mah ila kan tlangvalte'n football vangin tualchhungah eizawnna an hmu a, India ram hmun dangah club lian zawkah hlawh sang zawk neiin an chhuak thei a, result lawmawm tak tak kan dawng reng bawk a, kan hlawhtling hle niin kan ngai. Tunah a chi dang deuh Futsal League kan kalpui leh tur hi kan lawm a, hei hian rah tha tak a chhuah leh ngei kan beisei," tiin a sawi.

MFA lawmthu
MFA Honorary Secretary Lal­nghinglova Hmar chuan, "Futsal hi Mizote'n kan hmel­hriatna la rei lo mah se tunah chuan kan uar ta hle a, kan ram nen pawh a inmil hle a ni. Asian Football Confederation lamin AIFF chu futsal lama tan la thar turin a hrilh a, chumi kawngah chuan AIFF-in state tinah futsal lamah tan la thar turin hriattirna a chhuah bawk. MFA chuan football-a kan lo hlawhtlinpui tawh league siam ngei tha a ti a, sum leh pai leh a tul angte tum turin MPL lama kan thawhpui Zonet TV kan han dawr leh chawt a, anni lamin inremna min lo siampui thei leh ta hi kan lawm takzet a ni," a ti.

League khel turte chu
MFA Futsal League khel tur zawnna 'playoff' hi September-ah khan team 25-in an khel a, October 12 khan khelh zawh niin a thiam team 16 khel turin an tling tawh.

Heng team 16-te hian veng/khua an behchhan vek a, 'veng-veng inelna' angin kalpui a ni ang. MFA Futsal League khel thei tura tlingte chu - Samuel FC, Armed Veng South; FC Thyristor, Ramhlun Venglai; Whetstone FC, Ramthar Veng; Dawrpui Spartans, Zothan Futsal, Chanmari; Lalluaii FC, Electric Veng; FC Bungkawn; Team Gideon, Kanan LM Futsal Club, Durtlang; Chhinga Veng FC; DSZ Saron Veng; Ramhlun South FC, Laipui FC, Laipuitlang; Lawmna FC, Dinthar; Hming­sanga FC, Ramhlun North leh Bawngkawn FC te an ni.

League kalphung
All India Football Federa­tion-in India rama Futsal mumal zawka kalpui a tum tak avangin 2017-2018 season atangin state football association tinte chu mumal taka futsal kalpui turin a hriattir a, MFA-in hei hi bawhzuiin India rama AIFF hriatpuia futsal league hmasa ber bul tan turin MFA chuan ke an pen ta a ni.

MFA Futsal League-a team 16-te hi group hnihah then an ni dawn a, group khatah team pariat ve ve an awm ang. Group-a awmte vawi khat an inkhel kual chhuak ang a, a sang pali ve vein quarter final an khel ang. Quarter final leh semi final hi double leg-a khelh tur a ni a, chumi zawhah final khelh a ni ang.

League inbuatsaihna
MFA chuan Futsal League thleng tur hian hun rei tak aṭangin inbuatsaihna a kalpui tawh a, FIFA Futsal rules zirna hunte a siam bakah Futsal Referee Clinic a buatsaih tawh a, Asian Football Confederation hnuaiah referee training tur mi pahnih a tir tawh.

November-ah khan AFC Level I Futsal Course chu AIFF-in Aizawlah an nghat a, Mizoramah AFC coaching certificate nei futsal coach kan neih theihna turin ṭan an la.

Hei bakah hian Trainer's training buatsaihin futsal coaching-a hriat tur zualpuite zirna hun an siam bawk a ni.