Ronaldo chanchin an sawi zui

Cristiano Ronaldo-a'n Portugal tan penalty a chhuih lut a, mi tam takin khawvela footballer ṭha ber ang hiala an ngaih hi a chanchin an sawi zui - a penalty hmuh dan sawisel a ni a, a record siam an sawi a, club sawmtu a neih thu an sawi bawk!

A dive!
Ronaldo penalty hmuh dan a nem deuh niin a lang a, a lungawi lo langsar ber chu Ghana boss Otto Addo a ni. Addo chuan, "Referee khan penalty ni miah lo kha penalty a pe a, mi zawng zawngin an hmu. Eng nge a chhan ni ang? Ronaldo a nih vang a ni mai lo maw?" a ti.

Addo hi inkhelh zawha press conference-ah journalist ṭhenkhatin penalty chungchang hi an zawt leh a, Borussia Dortmund assistant coach hlui chuan, "Referee kha zawt rawh u, midang ni ta se, a pe kher ang em, tih chungchangah proof ka nei lo. Player an intawk fuh ngei a, mahse, VAR khan enge a tih? Referee khan min ṭan lo a ni," a ti a, a lawm lo hle.

Ronaldo & record
Portugal captain Ronaldo-a'n goal a khung a, record a ni nghal - mipa player zinga FIFA World Cup pangaa goal khung thei hmasa ber a ni a, Cameroon legend Roger Milla (1994 kum 42 leh ni 39) tih loha World Cup-a goal khung thei upa ber a ni - kum 37 leh ni 292 a ni tawh.

Ronaldo chuan, "Kan chak a, ka team ka pui thei a, a tawk e. Thil dang chu a ṭangkai lo," a ti a, Portugal boss Fernando Santo chuan, "Khawvela player awm tawh zinga ṭha ber pawl a ni. Mi ropui bik a ni a, legend lo awm tawhte ang tho kha a ni a, kum 50 hnuah pawh a chanchin kan la sawi ang," a ti.

Sawmtu lam
United leh Ronaldo an inṭhen a, World Cup a khelh karah pawh a club khelhna tur an inrinsiak. Tun dinhmunah chuan Al-Hilal hming lam rik a ni - Saudi club hian Ronaldo hi an ngaihven a, hetiang boruak karah hian Saudi Arabia sports minister Prince Abdulaziz bin Turki Al-Faisal chuan an rama khel tura Ronaldo a duh thu a sawi bawk.

Ronaldo hian tun hnaia United a sawiselna interview-ah nipui laia Al-Hilal-in an sawm thu a lo sawi tawh a, Saudi club hian hetihlai hian kum hnih chhung atan pound maktaduai 305 hlawhtir an inhuam - a kum a tam ve tawh a, World Cup zawh lamah Saudi lam a hawi a nih pawhin a mak lo ang.