Manchester United leh Cristiano Ronaldo an inṭhen

Manchester United chuan Thawhlehni zan khan club legend Cristiano Ronaldo nen inhriattiam tawhnain an inṭhen thu an puang.

Kum 37 mi Ronaldo hi FIFA World Cup khel turin Qatar-ah a awm mek a, Portugal hian zanin dar 9:30 hian Ghana an hmachhawn dawn. Portugal captain hi tun World Cup-a club nei lo awmchhun a ni.

Man United chuan, "Old Trafford-a ṭum hnih a cham chhunga a hnathawh ropui tak avangin a chungah lawm hle. Amah leh a chhungte an kal zelna turah duhsakna kan hlan," tiin Ronaldo an thlah.

English club hian, "Manchester United hnuaia hnathawk zawng zawngten Erik ten Hag hnuaia hmasawnna chan theih nan ngaihtuahna an seng a, khelmual chhunga hlawhtlinna chang ngei turin thawhhona a ṭha a ni," tiin an ziak tel bawk.

Man United-in club legend Ronaldo meuh contract an tihtawp chhan hi TalkTv-a Ronaldo leh Piers Morgan inkawmna vang a ni a, Portugal captain hian he inbiaknaah hian club hotute, coach leh a player khelhpui ṭhinte na takin a sawisel.

Thawhṭanni khan Ronaldo hian Man United nena an buaina vangin Portugal squad a buai phah loh thu a sawi a, a duhzawng a sawi theih thu a sawi bawk.

Ronaldo hian kar khatah £500,000 a hlawh a, Old Trafford-ah hian thla sarih daih contract a la neih chu an titawp. Portugal captain hian club a neih tak loh avangin January transfer-ah a club duh zawng a thlang thei ang a, chutihrualin tuna a hlawh zat ang pe thei club erawh an vang ang.

Cristiano Ronaldo chuan, "Manchester United nen inbiakna neih hnuah contract titawp turin inremna kan siam. Manchester United hi ka hmangaih a, fan-te pawh ka ngaina, eng tikah mah an chunga ka ngaihdan hi ka thlak lo ang. Chutihrualin tun hi chona thar hmachhawn tura hun ṭha a ni. Tun season khelh hmabak leh an hmalam hun zel ṭha taka khel turin club pawh duhsakna kan hlan," tiin thuchhuah a siam.

Ronaldo boruak inlumlet dan :
August 2021: Juventus aṭangin Man United-ah a kir a, kum hnih contract a ziah bakah kum khat pawhsei theih dan a awm bawk.
September 2021: Old Trafford-a match hmasa berah goal hnih a khung a, Newcastle 4-1 in an hneh.
September 2021: Villarreal lakah injury time-ah chakna goal khungin 2-1 inhnehna an chang a, UCL-a khel tam ber record a siam.
December 2021: Arsenal lakah goal hnih a khung a, 3-2 in an chak. Portugal captain hian a career-ah goal 800 a khung.
January 2022: Brentford 3-1 a an hneh ṭumin Ralf Rangnick-a'n a thlak a, a lungawi lohna a ti lang.
March 2022: Tottenham 3-2 in an hneh a, hattrick a siam.
April 2022: Norwich 3-2 in an hneh a, hattrick a siam leh bawk.
May 2022: Premier League-ah goal 18 a khung a, goal khung tam lamah pathumna a ni. Goal khung tam lamah pathumna ni phain United erawh parukna an ni thung.
July 2022: Champions League an khelh phak loh avangin United thuneitute hnenah chhuah a duhthu a hrilh a, team dang zawng Thailand leh Australia-ah pre season atana an inpuahchah laiin mimal harsatna avangin chawlh pek a ni thung.
July 2022: Rayo Vallecano nen friendly match an khelh ṭumin halftime-ah thlak a ni a, stadium a chhuahsan hma. Erik ten Hag chuan a chet dan chu pawm theih a nih loh thu a sawi.
August 2022: United tan minute 90 a khel a, Brentford lakah 4-0 in an tlawm.
October 2022: Everton lakah bench aṭangga lutin goal pawimawh a khung a, 2-1 in a hnehna an chang a, club goal 700-na a ni bawk.
October 2022: Tottenham nen an inkhelh ṭumin bench-ah a awm a, 2-0 in an chak. Hun tawp hma hretin Ten Hag-a'n luhtir a tum a, khelmuala lut aiin stadium chhuahsan a thlang.
November 2022: TalkTV-ah Piers Morgan-a'n a kawm a, club-in a phatsana a ngaih thu a sawi.

Ronaldo sana thar :
Man United-in contract an tihtawp sak hnu hian Ronaldo hian instagram-ah a sana thar thlalak a dah a, a sanah hian Real Madrid kawr haa Man United lama a goal khung lai lem a chuang.