Messi awmna Argentina ngamtu Saudi Arabia

World Cup match hmasa berah Saudi Arabia an tum dawn tih an hriat khan, world champion vawi hnih ni tawh Argentina hi an lawm viau maithei, mahse an intum ta ngei a - Lionel Messi awmna La Albiceleste hi 2-1 in an chak lo. Match 35 la tlawm loin an ngam loh chu Saudi Arabia an ni.

Nimin tlai group C inkhelah Argentina tana Messi goal khung chu Alshehri leh Salem Aldawsari ten an chhanglet. Herve Renard-a enkawl Saudi Arabia lamin tlarhnung an remphui a, goal mawi pahnih an khung bawk avangin chak an phu.

Nizan khan Poland leh Mexico an inkhel a, result kan hre hman lo. Argentina hian an group-a team nem ber tura ngaih an hneh lo a, last 16 lut tur chuan hna a hautak dawn. November 26, Inrinni zan dar 12:30-ah Mexico an hmachhawn leh ang.

Messi-a goal
Lusail Stadium-a inkhelah a tir aṭangin Argentina an chungnung, minute hnihna lekah Lionel Messi rawn dawk chhuakin goal-ah a pet nghal, keeper Mohammed Alowais-a'n a lo dang hram a, shot hmasa berah an him phawt.

Mahse, minute 10-naah Argentina lamin sawi zui hlawh takin penalty an hmu zui a, captain Messi rawn ding chhuakin 'cool' zetin a khung, keeper Alowais-a'n ball kalna tur lam a chhutsual, an lama goal lir lut lai a thlir liam.

Saudi Arabia coach Herve Renard-a'n huaisen takin a defender-te a tawlh hma tir a, box aṭanga hla deuh tak aṭangin goal an veng a, defender ten thluak hmang takin offside an siam fuh thei hle.

Chawlhlawk hmain La Albiceleste kha vawi sarih ngawt an offiside hman, offside avang hian Messi goal khat bakah Lautaro Martínez goal khung pahnih hnawlsak an ni a, penalty an chhuah tih loh chu Saudi Arabia lamin an tum an ti hlawhtling thawkhat viau.

A mak asin!
Inkhel tir lam thlir chuan, Argentina lamin engzat nge an khung belh ang? tih chu zawhna a ni. Mahse, football-ah chuan thleng thei lo a awm lo, second half an khelh meuh chuan inkhel kalhmang a danglam daih.

Saudo Arabia-in Argentina tlarhnung an su hawng, striker Saleh Alshehri-a'n amah vengtu Christian Romero paltlangin keeper Emiliano Martínez dan theih lohin a khung, mak tia an hawihai a reh fel hmain Salem Aldawsari a rawn inlar leh nghal.

Aldawsari-a'n amah vengtu player pathum a vir khum a, rang zeta a insiamrem hnuah keeper Martinez tana dan ngaihna awm loin an goal hnihna a khung, mawi tak a ni. An hna chu goal venhim zui a ni a, tlin takin hna an thawk chhunzawm.

Argentina coach Scaloni-a'n friendly match hnuhnung bera a la chhawr loh Romero a ring chu a tisual, amah thlaktu Lisandro Martinez-a'n hna a tlin zawk, match lehpekah pawh Manchester United defender hian hmun a chan a rinawm.