Palaihawl champion Puipuia

Mizo Inchai Tittle Fight-ah palaihawl champion thar kan hmu. Remruatpuia chuan Lalmalsawma hnehin, a vawi khat nan Mizo inchai title fight huangah champion belt a hreng a, atan hun chhinchhiah tlak bik a ni ang.

Thawhlehni zan khan Dawrpui Multipurpose Centre-ah inchai hi neih niin, round 10 an inbeih chhungin Puipuia a chungnung zawk vek. Saitual tlangval hian round 7 leh 10-ah phei chuan Kolasib tlangval hi bawh betin full point a hmu.

Inchaiah hian round 10 chhung khelh tluan ngei a ngai a, round khat hi minute thum zel niin round la hnem zawkin hnehna an chang. Tun ṭumah hian palaihawl champion lai a kg a tam tak avangin a tel thei lo, title ruak awm an inchuh a ni.

Puipuia chuan, "Pathian vang chauh a ni, hetiang dinhmun ka thleng ve thei mai hi ka lawm. Kan khua Saitual leh ka awmna Bethlehem Vengthlang ten min thlawp ṭha em em a, an chuangah ka lawm takzet.

"Inchai ka hmachhawn theih nan hian mi tam takin min pui, a bik takin min sponsor tu Elite Gym, Sky High Auto Work leh VRS construction chungah ka lawm takzet," tiin Vanglaini a hrilh.

Champion hian Rs 50,000 a dawng a, pahnihna in Rs 30,000 a dawng thung. TV aṭanga en man lut 90% chu wrestler-te chan tur a ni a, hei hi infiammi ten an insem rual leh tura tih a ni thung.