Zaninah Palian Title Fight
A hun a thleng ta, nghakhlel taka Mizo mipuiten kan thlir Mizo Inchai Palian Ttitle Fight chu zanin hian khelh a ni dawn. Champion lai Lalsangliana hmaah Lalnunfela a ding dawn, a hmuhnawm ngei ngei dawn tih a chiang.
Zanin dar 8:00 aṭangin Dawrpui Multipurpose Centre-ah ennawm chhuah ṭan a ni dawn. Nulian title fight hmuh tur a awm dawn bawk - Lalhmangaihsangi leh Lalsiamthari ten a ṭha ber nih an inchuh ang, anni bakah hian exhibition match pahnih a awm dawn bawk.
Title fight hi Zonet chuan live-in an pe chhuak, a hmuna enna tur ticket erawh hralh zawh a ni tawh. Zonet Empai lamah pawisa chawia en theih a ni bawk, online kaltlanga enna pawisa hi wrestler ten 90% an chang dawn - mipui tan pawisa sen a na lo ang.
Sangliana a inpeih
Lalsangliana hian 2018 khan Mizo Inchai palian huangah title a la, a kawnghren kawl lai hi chhuhsak thei an awm lo, tun thlengin a hreng nghet hle. October thla tawp khan Sangliana hian, "Titile Fight turin ka inpeih tawh," tiin Vanglaini a lo hrilh tawh.
Mizo inchaiah hian inbawhbeh bakah inchawi kanin full point hmuh hmuh theih a ni. Sanglaina chuan, "A bet anga, a kang bawk ang," tiin a lo sawi tawh bawk a, a khingpui tur chu hlauhna leh huphurhna a nei lo - a inringtawk takzet.
Upper Republic wrestler Sangliana hi Excise & Narcotics Departmnent-a thawk lai a ni a, tun inchai a hmachhawn theih nan hian a hnathawhna hotu lamin inbuatsaihna hun an siamsak, zing leh tlaiah ngawrh takin training a nei ṭhin a ni.
Fela a zam lo
Mizo Inchai kum 2011-ah Lalnunfela a rawn champion, kha tih lai khan kum 20 chauh a la nih avangin champion thei naupang ber a ni hial. A hnuah erawh Sangliana a hneh lo a, hun rei tak hnuah a lo kir leh dawn.
Salem Veng tlangval Fela chuan, "Hmingmawia hnehin ka champion tawh a, a hnu lawkah ka thin enkawl a ngaih avangin phai lamah ka chhuk a ngai. Ka taksa dinhmun a ṭhat tawk loh laiin Sangliana lakah ka vanduai, tunah chuan ka fit tawk tawh," tiin a sawi.
Sangliana nen hian tun hmain vawi thum an intum tawh a, Fela hi vawi hnih chakin record a nei ṭha zawk. Salem Veng tlangval Fela hian 2-1 a hma a hruaina chu 3-1 nih tir a tum dawn, champion lai Sanglaina'n hei hi a phal dawn lo - inchai hmuhnawm tak an chhawp chhuak ngei ang.
November 17, Ningani (8:00 PM)
Main Event & Closing Ceremony
EXHIBITION MATCH: PALIAN
C.Lalrinawma, Kolasib Vs R. Lalrinawma, E. Lungdar
EXHIBITION MATCH: PALAIHAWL
Ronnie Zorinpuia, Thenzawl Vs Lalmuanpuia, Tachhip
TITLE FIGHT: NULIAN
Lalhmangaihsangi, Dilkhan, Saitual Vs Lalsiamthari, E.Lungdar
TITLE FIGHT : PALIAN
Defending Champion Challenger
Lalsangliana, Upper Republic Vs Lalnunfela, Salem Veng