A chung bera Krismas hmang tur Arsenal

A rei ve ta deuh, ṭhangkhat lian zet a liam ta - Krismas laiin Arsenal chu Premier League hmahruaitu an nih kha, kum 2007 hnua a vawi khat nan Gunners hian table chung ber luah chungin Krismas ruai an ṭheh dawn.

Champion lai Manchester City chu Brentford lakah 2-1 in an chesual, he inkhel result hian Masi laia Mikel Arteta naute awmna tur a ni chiang tawh. North London club hian an hmahruaina sawhnghet turin Wolves chu 2-0 in an hneh zui zat.

Arsenal hian 2016 hnu lamah, English football inelna sang berah hian pangana aia sang nih an la nei lo - an tan chuan tuna an awmna hi duhawm tak a ni. Chutih rualin World Cup kum a ni a, season dang aiin match an khel tlem.

Arteta chuan, "A nihna takah chuan hetiang dinhmuna kan din hi miin an ring lo, mahse kan awm miau si. Tunah chuan kan thlen chin hi hlim takin kan lawm phawt mai tur a ni," a ti a, hmabak an la ngah thu leh a hautak tur thu a sawi bawk.

A chungah Arsenal
Manchester City inkhel result hresain Wolves an tlawh a, manager thar Julen Lopetegui-a'n team a la enkawl lo, manager lailawk Steve Davis-a'n mahni inveng tak chungin mikhual a hmachhawn, a player tlan chak Adama Traore chu thiam taka hman a tum.

Wolves ruahmanna a fuh teuh hle, counter attack hmangin Arsenal an bei a, mahse Traore leh Goncalo Guedes ten an hun ṭha an chhawr lo, goal hrulah hlauhawm takin an pet liam, hun ṭha dang erawh an hmu chhunzawm lo.

Hliam vangin Granit Xhaka lakchhuah a ni a, Swiss midfielder thlaktu Fabio Vieira-a'n Martin Odegaard goal khung tur a siamsak, an goal hmasa ber luh nana ball fing pe chhuaktu Gabriel Jesus lam hmaih a thiang lo, an goal hnihna pawh captain khung bawk a ni.

Bukayo Saka-a'n Wolves defender inkarah Jesus tan ball ṭha bik a pe a, mahse bar a pet per. Brazilian striker hian Gabriel Mrtinelli siamsak chu a khung lo chiah a, mawi zeta a khung erawh offside vanga hnawlsak an ni thung, khel ṭha viau mah se goal hmaah a vannei rih lo.

Arsenal manager Arteta chuan, "World Cup chawlh hian kan season hman tluang lai a tih chhiat loh hram ka beisei, player zin chhuak turte duhsakna ka hlan rualin dam taka lo kir leh turin ka duh," tiin a naute chu Qatar World Cup lamah inhliam lo hram se a duh.

Gunners-in Premier League an khelh leh hun chu December 26 (Boxing Day) a ni daih tawh dawn, West Ham an mikhual ang. World Cup hi December 18 thleng awh a ni dawn, final khel tan chuan a inkarah ni riat chiah chawlhna hun a awm dawn tihna a ni.

City chesual
Pep Guardiola nauten kar laihawlah League Cup an khel a, team ṭha Chelsea an tum avangin player ṭha an hman a ngai. Blues laka inkhel hah Aymeric Laporte, Rodri leh Ilkay Gundogan ten bul an ṭan nawn a ngai.

Etihad Stadium ni mah se Man City inkhel a nung tawk lo, England tana koh loh Ivan Toney-a'n World Cup khelh a phu tih lantir nan minute 16-naah goal hmahruai a khung - English striker hian hun tawp dawnah a khung belh bawk a, goal thum a khung lo khan City an vannei.

Erling Haaland leh Kevin de Bruyne te nidang angin an inkawp fuh tawk lo, ball in pek sual an nei fo. De Bruyne, Bernardo Silva leh Gundogan ten mawi tak taka chet nei mah se a hmawr an bawk fuh thei tlat lo, goal thun khawl Haaland meuh pawh a 'nil' tlat.

Man City hian Fulham hneh turin hun tawp dawna penalty an khung a ngai a, tun ṭumah chuan penalty beisei nei nual mah se pek an ni lo. Guardiola naute hi anmahni khelmualah ngei pawh chak chiang sa, tia sawi ngawt theih an ni ta bik lo.

Guardiola chuan, "Tun ṭumah chuan team ṭha zawkin hnehna an chang. Bees khan tlarhnung an veng ṭha em em a, keini lamain ṭhiat turin thahrui kan nei lo. Inkhel harsa tak a ni, a bik takin hla tak taka ball an in pe kha kan veng hleithei lo.

"Champions League lamah sawisel boa kan khelh a ngai dawn, chutiang bawkin Premier League-ah pawh a ngai, season chawhnu lamah ṭha leh zual zawka kan khelh theih ka beisei," tiin a sawi.