Mizoram Police-in Electric an hmet thim

Zote Honda MPL9-ah Mizoram Police-in Electric Veng chu an phur vanglai takin 3-1 in an hneh. Nimin tlai RG Stadium-a inkhelah hian Police tan Malsawmfela'n goal hnih a khung a, EFC tan Jonathan Lalrawngbawla'n goal khat a khung ve bawk.

Electric Veng hi coach thar Lalremtluanga hnuaiah an che ṭha a, match hmasa pali aṭangin point riat tehmeuh an hlawh chhuak. Police lakah pawh EFC-in bul an ṭan ṭha a, an goal bawh pawh a na.

Police keeper F. Lalmuanawma'n inkhelh ṭantirh lamah Lalsangkima'n pet chu ṭha takin a dang a, keeper ṭha mi Muanawma hian Jonathan-a penalty pet chu a dan sak leh bawk.

Lalbiaksanga Colney hote an insiamrem a, minute 27-naa corner kick aṭanga ball kal chu Lalnunsanga'n (Talea) a tauh goal. Tawnhriat nei striker Sawmfela'n penalty a hmang ṭangkai a, 'cool' takin minute 29-naah goal kilah a dah.

Second half-ah Sawmfela hian a class a pholang a, right back Lalrinzuala Khiangte cross chu a tauh goal - MPL9-ah goal sarih a khung tling ta. Minute 56-naah 3-0 a ni a, Police dinhmun a ṭha.

Electric Veng tan goal thum chhuah hnuah thochhuah a harsa tawh a, mahse an tlawm duh lo. Minute 65-naah Jonathan-a'n goal khatin a chhang let a, goal dang a lut tawh lo.

Electric Veng tan semifinal beisei ngam a har tawh dawn a, an relegate erawh a hlauhawm rih lo. Sikkim zin tur Police tan point thum hlu bik a ni a, point thum an hmuh avangin pahnihnaah an awm rih. Match hnuhnung pahniha Police hi an kim dawn lo a, la vanduai ve thei an ni.