Mipa leh hmeichhe tan hlawh inang

India rama cricket thuneitu sang ber Board of Control for Cricket in India (BCCI) chuan ram chhunga cricket khelte tan hlawh inang pek a nih tur thu an sawi, mipa leh hmeichhe player-ten hlawh inzat an nei dawn tihna a ni.

BCCI secretary Jay Shah chuan, "Inthliarhranna a awm loh nan, BCCI hnuaia hmeichhe cricket khelte chuan mipa hlawh zat an hlawh ve tawh ang. Indian cricket chuan bung thar a kai dawn a ni," tiin twitter lamah a tarlang.

Mipa leh hmeichhia ten hlawh inang an nei dawn a nih chuan, hmeichhe player pawhin test match an khelh chuan Rs. 15 lakh vel an hlawh dawn a, one day international khel tan Rs. 6 lakh niin T20 khelte chuan Rs. 3 lakh an hlawh thung dawn a ni.

Kumin tir lam khan BCCI chuan hmeichhe tan Indian Premier League a awm ve tur thu an lo sawi tawh. Team panga telna tur hmeichhe IPL hi nakkum aṭanga neih tur niin, season thar hi nakkum March thla aṭanga khelh tur a ni ang.