Venus hnehin Wozniacki a champion
Hmeichhe tennis player ṭha zual pariat tena an khelh WTA Finals chu Pathianni zan khan a hmawr bawk a ni a, Caroline Wozniacki chuan Venus Williams hnehin a champion - Denmark nula Wozniacki tan tennis a khelh hnua a nomawi dawn ropui ber a la ni.
Singapore-a inelna neihah kum 37 mi Venus-i'n final lut thei upa ber record a siam a, nomawi inchuhna inkhelah erawh American star Venus hian game hmasa panga a la lo, Wozniacki hian harsatna lian tham tawk loin 6-4, 6-4 in hnehna a chang - Venus nen vawi sarih an intawnah vawi khat a chakna chiah a ni.
Kum 27 mi Wozniacki chuan, "Season hmasa khan court chhungah leh a pawnah harsatna ka tawk hnem a, kuminah erawh nuam ti takin ka inkhel thei a, ka tan hei aia hun nuam leh hlimawm a la awm ngai lo," tiin a sawi.
World number 1 hlui Wozniacki hi hliam a neih ngun vangin season hmasa kha chuan world ranking-ah pawh 74-naah a tla hniam hman a, tunah erawh number 3 dinhmun a luah leh thei tawh.
Tun season chhungin hmeichhe player zingah number 1 ni ngelnghet thei an awm lo, Romanian nula Simona Halep chuan number 1 ni chungin season tawp a khar dawn tih a chiah tawh thung.