Der Klassiker Dortmund tan Lammuala goal khung tawhtu Modeste

Bundesliga-ah Inrinni zan khan football hmuhnawm bik chhawpchhuah a ni a, Borussia Dortmund leh Bayern Munich te 2-2 in an inhnehtawhk. Der Klassiker-ah hian Leon Goretzka leh Leroy Sane hmangin Bavarians-in hma hruai mah se Dortmund-in Youssoufa Moukoko leh Anthony Modeste hmangin siphurh an sut.

Dortmund tana Moukoko goal khung tur siamsaktu leh siphurh sutna goal khungtu substitute Modeste hi 'Mizo chhangban' ei tawh zinga mi kha a ni a, Hoffenheim-in Mizoram XI 3-0 a an hneh khan Lammualah goal hmahruai a khung. BVB player lei thar Sébastien Haller damlohna avangin kum 34 mi Modeste hi lakluh a ni a, Dortmund ṭantute zingah a tla na tawh hle.

Bayern an thiam
Champions League-ah Bayern Munich hi Barcelona leh Inter Milan te nen group khatah an awm a, harsatna nei loa knockout stage an paltlang avangin an thiam tih a chiang.

Signal Iduna Park-ah pawh Bayern-in an thiam tih an pholang a, mualneitu Dortmund-in an ngam lo hle. Chutihrualin Dortmund pawhin chance an nei tho a, Raphaël Guerreiro ball pet kawh zet chu Germany no. 1 Manuel Neuer-a'n a dang ṭha.

Minute 31-naah Sadio Mane ball pek changtu Jamal Musiala-a'n rilru fim takin box chhungah ball a chang a, box pawna awm Leon Goretzka chu pein ani hian ṭha zetin a pet goal.

Manuel Neuer-a'n a hna a tlin a, tlarhma lamah Bayern player-te an hmuhnawm. Minute 53-naah Musiala ball pek chu Leroy Sane-a'n box pawn aṭangin a khung.

Goal hnih khung hnuah pawh Bayern bawk an hmuhnawm a, Dortmund tlarhnung an ṭhiah dan chu hmuhnawm a tling. Amaherawhchu Mane leh Musiala te vanneih zan a ni lo a, Bayern-in goal an khung belh lo.

Dortmund nge nge
Yellow wall-in Dortmund an thlawp ṭha a, an beidawng lo. Minute 74-naah Modeste ball pek chu kum 17 mi Youssoufa Moukoko-a'n a pet goal. Bayern tlarhnung pawp deuh mah se Moukoko a insiamrem ran avangin fak a phu.

Dortmund an phur chhunzawm a, dinglam aṭanga Karim Adeyemi cross ṭha zet chu Modeste-a'n a pet fuh tawk lo - pet fuh ngat se a hnaih tawh avangin Neuer-a tan tih theih a awm lo ang.

Minute 90-naah Adeyemi laka foul-tu Kingsley Coman chuan yellow card vawi hnihna a hmu a, Bayern-in player 10-in an khelh a ṭul phah. Minute li hun pek belh a ni a, minute li pelh hretah defender Nico Schlotterbeck cross chu Modeste-a'n a tauh lut. Signal Iduna Park thawm a ṭha a, hun a tawp zui bawk.

Bayern leh Dortmund te hian point 16 ve ve an hmu a, pathumna leh palinaah an awm chhunzawm. Nizan khan hmahruaitu Union Berlin-in Stuttgart an hmachhawn a, pahihna Freiburg-in Hertha Berlin an tlawh bawk - result kan hre hman lo.