Europa League-ah Gakpo a che ṭha

Nipui bazara Premier League club ṭhenkhat nena sawizawm Cody Gakpo chu Europa League-ah PSV tan a che ṭha hle. Dutch club PSV hian Ningani zan khan khualmualah Zurich 5-1 in an sawp a, kum 22 mi Gakpo hian goal hnih a khung.

Stadion Letzigrund-ah PSV-in mualneitu Zurich hneh turin harsatna an tawk lo a, Dutch winger Gakpo hian goal hnih a khung bakah assit vawi khat a nei bawk. Netherlands international Gakpo hian tun season inelna hrang hrangah goal 12 khung tawhin assist vawi 10 a nei tawh a, a record hi a chhuanawm hle.

Gakpo hi Europe league sang hoa goal 10 leh assist 10 nei tling ve ve thei awmchhun a la ni a, a assist leh goal khung belh khawm hi 22 niin Manchester City chhuanvawr Erling Haaland nen goal-a an inrawlh zat a inang.

Europa League inkhel dangah Jose Mourinho kaihhruai Roma-in an mualah Real Betis 2-1 in an hneh lo a, Italian club hi an dinhmun a ṭha lo. Arsenal leh Manchester United ten an khingpui an hneh thung a, English club pahnih hian knockout stage an hnaih zel.