Mizoram tan medal hnekchhuah ngei kan tum - Faka

National Games 2022 boxing inelnaah Mizo boxer tan medal beiseina a awm a, coach pahnih Lalfakzuala (SYS) chuan Mizoram tan medal hnekchhuah ngei an tum thu Vanglaini a hrilh.

Mizoram aiawh hian mipa boxer pathum Malsawmtluanga (middleweight), Lallawmawma (featherweight) leh C. Lalduhawma (Light heavyweight) te an tel. Boxing inelna hi Gandhinagar-ah neih a ni a, Duhawma hian Sumit Pooniya hneh loin first round-ah a tla a, boxer dang pahnih tan medal beiseina a la nung thung.

Lunglei Electric tlangval Malsawmtluanga hian vawiin tlai dar 3:15 hian hian first round-ah Gujarat boxer Sahil Aslambhai Nilgar a hmachhawn dawn. Hnehna a chang a nih chuan Uttarakhand boxer ṭha Pankaj Kumar nen October 10, Thawhṭanniah an inhnek leh ang.

Mala hi Lunglei SAI aṭanga inzir chhuak a ni a, tun inelnaa tel tur hian 2021 Senior National C'ship-ah quarterfinal a thleng. Kum 2021 vek khan Kolkata All India Invitation 2021-ah silver medal a la.

Tun hnaiah Mala hian hma a sawn tih a lang a, August thla khan Army Championship-ah gold medal lain best boxer-ah thlan a ni bawk. Best boxer a nih avang hian Army Sports Institute, Pune-ah training a nei chhunzawm a ni.

Coach Lalfakzuala chuan, "Beiseina sang tak ka nei a, chutihrualin game chu game a nia, eng pawh thleng thei a ni. Ṭha deuha kan inngaih lai pawh hian chak lo thei chu kan ni. Chutihrualin engkim ti thei Pathian kan nei a, Mizo mipuite result duhawm kan neih theih nana min ṭawngṭaipui turin ka sawm a ni," tiin Vanglaini a hrilh.